ଅନୁଗୁଳ: ସ୍ଥାନୀୟ ଷ୍ଟାଡିୟମ ପରିସରରେ ଶୁକ୍ରବାର ସନ୍ଧ୍ୟାରେ ୧୩ତମ ଅନୁଗୁଳ ଜିଲ୍ଲା ସାଂସ୍କୃତିକ ମହୋତ୍ସବ ଓ ପଲ୍ଲୀଶ୍ରୀ ମେଳା ବର୍ଣ୍ଣାଢ୍ୟ ପରିବେଶରେ ଉଦଘାଟିତ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହାକୁ ଉଦଘାଟନ କରି ଜିଲ୍ଲାର ଶିଳ୍ପ ଓ ସାଂସ୍କୃତିକ ବୈଭବର ପ୍ରଶଂସା କରିବା ସହ ଜିଲ୍ଲାବାସୀଙ୍କୁ ବିକାଶ ପାଇଁ ସଂକଳ୍ପବଦ୍ଧ ହେବାକୁ ଆହ୍ୱାନ ଦେଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ୪୧୪ କୋଟି ଟଙ୍କାର ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ କରିବା ସହ ୧୪୫ କୋଟି ଟଙ୍କାର ପ୍ରକଳ୍ପ ଲୋକାର୍ପିତ କରିଥିଲେ। ସାତକୋଶିଆର ବିକାଶ ପାଇଁ ୧୦୦ କୋଟିର ଅନୁମୋଦନ ସହ ଜିଲ୍ଲା ଖଣିଜ ପାଣ୍ଠିର ସଠିକ ବିନିଯୋଗ ଉପରେ ସେ ଗୁରୁତ୍ୱାରୋପ କରିଥିଲେ।
ଉତ୍ସବରେ ଜିଲ୍ଲାପାଳ ଓ ଜିଲ୍ଲା ପରିଷଦ ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀଙ୍କ ସମେତ ସ୍ଥାନୀୟ ବିଧାୟକଗଣ ଉପସ୍ଥିତ ଥିଲେ। ସାଂସ୍କୃତିକ ସନ୍ଧ୍ୟାରେ ମଣ୍ଟୁ ଛୁରିଆଙ୍କ ସଙ୍ଗୀତ ଓ ପ୍ରଜ୍ଞାଙ୍କ କମେଡି ଦର୍ଶକଙ୍କୁ ବିମୋହିତ କରିଥିଲା। ମେଳାରେ ୧୨ଟି ରାଜ୍ୟର ସ୍ୱୟଂ ସହାୟକ ଗୋଷ୍ଠୀଙ୍କ ସାମଗ୍ରୀ ପ୍ରଦର୍ଶିତ ହେଉଥିବା ବେଳେ ପ୍ରଥମ ଦିନରୁ ହିଁ ପ୍ରବଳ ଜନଗହଳି ପରିଲକ୍ଷିତ ହୋଇଛି। ଏହି ମହୋତ୍ସବ ଚାରି ଦିନ ଧରି ଚାଲିବ।