ବଅଁରପାଳ: ସ୍ଥାନୀୟ ବଅଁରପାଳ ପାଞ୍ଚଗଡ଼ ସୋମନାଥ ସିଂହ ଜଗଦେବ ଉଚ୍ଚ ମାଧ୍ୟମିକ ବିଦ୍ୟାଳୟରେ ଚଳିତ ଶିକ୍ଷାବର୍ଷରେ ନୂତନ ଭାବେ ନାମ ଲେଖାଇଥିବା ଛାତ୍ରଛାତ୍ରୀଙ୍କୁ ଶିକ୍ଷାନୁଷ୍ଠାନ ପକ୍ଷରୁ ସ୍ୱାଗତ କରାଯାଇଛି। ଉତ୍ସବରେ ଶିକ୍ଷାନୁଷ୍ଠାନର ଅଧ୍ୟକ୍ଷ ଅଶୋକ କୁମାର ପ୍ରଧାନ ସ୍ୱାଗତ ଭାଷଣ ଦେବା ପରେ ପୁରାତନ ଛାତ୍ରୀମାନେ ସାମୁହିକ ବେଦମନ୍ତ୍ର ଉଚ୍ଚାରଣ ପୂର୍ବକ ଅକ୍ଷତ ପୁଷ୍ପବୃଷ୍ଟି କରି ତିଳକ ଲଗାଇ ନୂତନ ଛାତ୍ରଛାତ୍ରୀଙ୍କୁ ସ୍ୱାଗତ କରିଥିଲେ।
ଏହି ଅବସରରେ ରାଜନୀତି ବିଜ୍ଞାନର ବରିଷ୍ଠ ଅଧ୍ୟାପକ ସୁଜିତ କୁମାର ପଟ୍ଟନାୟକ ଛାତ୍ରଛାତ୍ରୀଙ୍କୁ ନିଜର ଭବିଷ୍ୟତ ଗଠନ ଓ ବିଦ୍ୟାଳୟରେ ଶୃଙ୍ଖଳିତ ଜୀବନ ବିତାଇ ଭଲ ମଣିଷ ହେବାପାଇଁ ପରାମର୍ଶ ଦେଇଥିଲେ। ଓଡ଼ିଆ ବିଭାଗର ଅଧ୍ୟାପିକା ଡ଼ଃ ରାଜଶ୍ରୀ ବାଘ ପାଠ୍ୟ ଖସଡ଼ା, ଅନୁଷ୍ଠାନର ନୀତିନିୟମ ଓ ପରୀକ୍ଷା ପ୍ରଣାଳୀ ଉପରେ ଆଲୋକପାତ କରିଥିଲେ। ଲାଇବ୍ରେରୀୟାନ ବିକ୍ରମ ଚରଣ ଜେନା ଇ-ପୁସ୍ତକ ସମ୍ବନ୍ଧୀୟ ଆଲୋଚନା ସହ ଧନ୍ୟବାଦ ଅର୍ପଣ କରିଥିଲେ। ଶେଷରେ ଶାନ୍ତିପାଠ କରାଯାଇଥିଲା।