ଆଜି ଅନୁଗୁଳରେ ସରଗରମ ରାଜନୀତି ! ଗୋଟିଏ ଦିନରେ ଆସୁଛନ୍ତି ମୁଖ୍ୟମନ୍ତ୍ରୀ ଓ ତିନି ବିଜେପି କେନ୍ଦ୍ରମନ୍ତ୍ରୀ

ଅନୁଗୁଳ : ଆଜି ଅନୁଗୁଳରେ ସରଗରମ ହେବ ରାଜନୀତି। ଗୋଟିଏ ଦିନରେ ମୁଖ୍ୟମନ୍ତ୍ରୀ ଓ ତିନି କେନ୍ଦ୍ରମନ୍ତ୍ରୀ ଆଜି ଅନୁଗୁଳ ଆସୁଛନ୍ତି। ଅନୁଗୁଳ ଗସ୍ତରେ ଆସୁଥିବା ମୁଖ୍ୟମନ୍ତ୍ରୀ ବହୁ ଯୋଜନାର ଶୁଭାରମ୍ଭ କରିବେ। ସକାଳ ଦିନ ୧୦ଟା ୫୦ରେ ସେ ଅନୁଗୁଳ ଷ୍ଟାଡିୟମ ପଡ଼ିଆରେ ପହଞ୍ଚିବେ, ସେଠାରୁ ସଭାସ୍ଥଳକୁ ଯିବା କାର୍ଯ୍ୟକ୍ରମ ରହିଛି। ଏ ଅବସରରେ ମୁଖ୍ୟ ମନ୍ତ୍ରୀ ଜିଲ୍ଲାର ୧୮ ଶହ ୫ କୋଟି ଟଙ୍କା ବ୍ୟୟରେ ମୋଟ୍‌ ୧୫୪୧ଟି ପ୍ରକଳ୍ପର ଉଦଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିବେ। ସେହିପରି ୭ ହଜାର ୪ ଶହ ମହିଳା ସ୍ୱୟଂ ସହାୟକ ଗୋଷ୍ଠୀ, ୭୫ ହଜାର ସ୍ୱାବଲମ୍ବୀ ମହିଳାଙ୍କୁ ୨୪୨ କୋଟି ଟଙ୍କାର ଋଣ ଓ ପ୍ରୋତ୍ସାହନ ପ୍ରଦାନ କରିବେ ବୋଲି ଜଣାଯାଇଛି।

ଏଥିସହ ବହୁ ପ୍ରତୀକ୍ଷିତ ଅନୁଗୁଳ ବସଷ୍ଟାଣ୍ଡର ଶୁଭାରମ୍ଭ କରାଯିବା ସହ ପାଳଲହଡ଼ାରେ ଡାକ୍ତରଖାନା, ତାଳଚେର ପୌରପାଳିକା ଅଧୀନରେ ନିର୍ମିତ ହେରିଟେଜର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ।

ପରେ ଅନୁଗୁଳ ଷ୍ଟେସନରେ ଆୟୋଜିତ କାର୍ଯ୍ୟକ୍ରମରେ ତିନି କେନ୍ଦ୍ରମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉପସ୍ଥିତ ରହିବେ। ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ଅନୁଗୁଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।