ଅନୁଗୁଳ: ଅନୁଗୁଳ ସ୍ଥିତ ସମର୍ପଣ ଏକାଡେ଼ମୀର ତିନୋଟି ଯାକ କ୍ୟାମ୍ପସ – ଅମଲପଡା, ପ୍ରଗତିନଗର ଓ ମାଟିଆସାହି ଠାରେ ମହା ଆନନ୍ଦର ସହ ଶିଶୁ ଦିବସ ପାଳିତ ହୋଇଯାଇଛି।
ଏହି ଅବସରରେ ଅନୁଷ୍ଠାନର ଅଧ୍ୟକ୍ଷା ବୈଷ୍ଣବୀ ଦେଓ, ପରିଚାଳନା ନିର୍ଦ୍ଦେଶକ ନିରୋଦ କୁମାର ସାହୁ ଓ ସହ ପରିଚାଳକ ପାର୍ଥ ସାରଥୀ ରାଉତ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ସେମାନେ ଦୀପ ପ୍ରଜ୍ବଳନ ପୂର୍ବକ ପଣ୍ଡିତ ଜବାହର ଲାଲ ନେହେରୁଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରିଥିଲେ ଏବଂ ଭାରତର ସ୍ୱାଧୀନତା ସଂଗ୍ରାମରେ ନେହେରୁଙ୍କ ଅବଦାନ ସମ୍ପର୍କରେ ଆଲୋଚନା କରିଥିଲେ।
ଅତିଥିମାନେ ମତ ରଖିଥିଲେ ଯେ, ଶିଶୁ ବିକାଶର ଚାବିକାଠି ହେଉଛି ଭାବପ୍ରବଣ ସୁରକ୍ଷା। ପିଲାମାନଙ୍କୁ ସମ୍ମାନ ଦେବା ଏବଂ ସେମାନଙ୍କ ମତାମତକୁ ଗୁରୁତ୍ୱ ଦେଲେ ସେମାନେ ଦାୟିତ୍ୱବାନ ହୋଇଥାନ୍ତି। ସ୍ନେହ ଓ ମମତା ସହିତ ପିଲାମାନଙ୍କୁ ଗଢ଼ିବା ଆବଶ୍ୟକ ବୋଲି ସେମାନେ ଗୁରୁତ୍ୱାରୋପ କରିଥିଲେ।
ଅନୁଷ୍ଠାନର ଏକାଡେ଼ମିକ୍ କୋଅର୍ଡିନେଟର ଭବାନୀ ଶଙ୍କର ସାହୁ, ନୀତିଶ ବେହେରା ଏବଂ ବୀରେନ ସାହୁ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି କାର୍ଯ୍ୟକ୍ରମରେ ଅନୁଷ୍ଠାନର ଛାତ୍ରଛାତ୍ରୀ, ଶିକ୍ଷକଶିକ୍ଷୟିତ୍ରୀ ଓ କର୍ମଚାରୀମାନେ ଉପସ୍ଥିତ ଥିଲେ।