ସାମ୍ବାଦିକଙ୍କ ସୁରକ୍ଷା ଓ ପେନସନ ଦାବି: ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଅନୁଗୁଳ ଜିଲ୍ଲା ସାମ୍ବାଦିକ ସଂଘର ସ୍ମାରକପତ୍ର

​ଅନୁଗୁଳ: ରାଜ୍ୟରେ କାର୍ଯ୍ୟରତ ସାମ୍ବାଦିକମାନଙ୍କ ଦୀର୍ଘଦିନର ସମସ୍ୟାର ସମାଧାନ ପାଇଁ ଅନୁଗୁଳ ଜିଲ୍ଲା ସାମ୍ବାଦିକ ସଂଘ (ADUJ) ପକ୍ଷରୁ ଏକ ପ୍ରମୁଖ ପଦକ୍ଷେପ ନିଆଯାଇଛି। ସାମ୍ବାଦିକଙ୍କ ପେନସନ, ସୁରକ୍ଷା ଏବଂ ସ୍ୱୀକୃତି (Accreditation) ଭଳି ତିନୋଟି ମୁଖ୍ୟ ଦାବି ନେଇ ସଂଘ ପକ୍ଷରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଜିଲ୍ଲାପାଳଙ୍କ ଜରିଆରେ ଏହି ଦାବିପତ୍ର ପଠାଯାଇଛି।

​ସଂଘର ସଭାପତି ଅଜିତ କୁମାର ଧରଙ୍କ ନେତୃତ୍ୱରେ ଦର୍ଶାଯାଇଛି ଯେ, ଜିଲ୍ଲା ଓ ବ୍ଲକ ସ୍ତରରେ କାର୍ଯ୍ୟରତ ସାମ୍ବାଦିକମାନେ ଅନେକ ବିପଦ ମଧ୍ୟରେ କାମ କରୁଛନ୍ତି। ତେଣୁ ସେମାନଙ୍କ ପାଇଁ ଏକ ବ୍ୟବସ୍ଥିତ ପେନସନ ଯୋଜନା ଲାଗୁ କରିବା ସହ ସାମ୍ବାଦିକ ସୁରକ୍ଷା ଆଇନ ପ୍ରଣୟନ କରିବା ଜରୁରୀ। ଏଥିସହ ସ୍ୱୀକୃତିପ୍ରାପ୍ତ ସାମ୍ବାଦିକ ବ୍ୟବସ୍ଥାରେ ସଂସ୍କାର ଆଣି ତୃଣମୂଳ ସ୍ତରର ପ୍ରତିନିଧିଙ୍କୁ ସାମିଲ କରିବାକୁ ଦାବି ହୋଇଛି।

​କେରଳ, ପଶ୍ଚିମବଙ୍ଗ ଓ ବିହାର ଭଳି ରାଜ୍ୟର ଉଦାହରଣ ଦେଇ ଓଡ଼ିଶା ସରକାର ଏ ଦିଗରେ ତୁରନ୍ତ ନିଷ୍ପତ୍ତି ନେବାକୁ ସଂଘ ଅନୁରୋଧ କରିଛି। ଏହି କାର୍ଯ୍ୟକ୍ରମରେ ସଂଘର କର୍ମକର୍ତ୍ତା ଓ ବହୁ ସଂଖ୍ୟାରେ ସାମ୍ବାଦିକ ଉପସ୍ଥିତ ରହି ସାମ୍ବାଦିକ ସମାଜର ମର୍ଯ୍ୟାଦା ଓ ସୁରକ୍ଷା ପାଇଁ ସ୍ୱର ଉତ୍ତୋଳନ କରିଛନ୍ତି।