ଶିକାର ପାଇଁ ଇଲେକ୍ଟ୍ରିକ ତାର ବିଛାଇବା ବେଳେ ମାଡ଼ି ବସିଲେ ବନ ଅଧିକାରୀ: ଜଣେ ଗିରଫ, ସାମଗ୍ରୀ ଜବତ

ଅନୁଗୁଳ: ଅନୁଗୁଳ ଜିଲ୍ଲା ଛେଣ୍ଡିପଦା ବନାଞ୍ଚଳ କଣଲୋଇ ବିଟର ମାରୁଢିପ ପ୍ରସ୍ତାବିତ ସଂରକ୍ଷିତ ଜଙ୍ଗଲ ନିକଟରୁ ଗୁରୁବାର ବିଳମ୍ବିତ ରାତିରେ ବନ ବିଭାଗ ଜଣେ ଶିକାରୀକୁ ଗିରଫ କରିଛି। ଗିରଫ ଯୁବକ ହେଲେ କଣଲୋଇ ଗ୍ରାମର ଗଜପତି ନାଏକ।

ସୂଚନା ମୁତାବକ, କଣଲୋଇ ବିଟ ପକ୍ଷରୁ ବନବିଭାଗ କର୍ମଚାରୀ ମାନେ ବିଳମ୍ବିତ ରାତିରେ ମାରୁଢ଼ିପ ପ୍ରସ୍ତାବିତ ସଂରକ୍ଷିତ ଜଙ୍ଗଲ ନିକଟରେ ପାଟ୍ରୋଲିଂ କରୁଥିଲେ। ଏହି ସମୟରେ ଜଙ୍ଗଲକୁ ଲାଗିଥିବା କାଜୁ ଜଙ୍ଗଲ ପାର୍ଶ୍ଵ ଦେଇ ଯାଇଥିବା ୧୧କେଭି ତାରରୁ ଜିଆଇ ତାର ଲଗାଇ ଜନ୍ତୁ ଶିକାର ପାଇଁ ତାର ବିଛାଉଥିବା ଦେଖି ବନ କର୍ମଚାରୀ ଚଢ଼ାଉ କରିଥିଲେ। ବନ କର୍ମଚାରୀଙ୍କୁ ଦେଖି ୩ଜଣ ଯୁବକ ଦୌଡ଼ି ପଳାଇ ଯାଉଥିବା ବେଳେ ବନବିଭାଗ ଜଣଙ୍କୁ ମାଡ଼ି ବସିଥିଲା।

ଗିରଫ ଯୁବକ ହେଲେ କଣଲୋଇ ଗ୍ରାମର ଗଜପତି ନାଏକ। ବନବିଭାଗ ତାଙ୍କ ନିକଟରୁ ଏକ ଜିଆଇ ତାର, ବାଡ଼ି ଓ କାଚବୋତଲ ଜବତ କରିଛି। ଏନେଇ ବନବିଭାଗ ଏକ ମାମଲା ରୁଜୁ କରି ଗଜପତିକୁ କୋର୍ଟଚାଲାଣ କରିଛି।