ବଇଣ୍ଡା: ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ ଠାକୁରଗଡ଼ ଥାନା ଅଞ୍ଚଳର ଏକ ବିଦ୍ୟାଳୟରେ ମଧ୍ୟାହ୍ନ ଭୋଜନ ଚାଉଳ ଚୋରି ଘଟଣାରେ ପ୍ରଧାନ ଶିକ୍ଷକ ଧରାପଡ଼ିଛନ୍ତି। ଶୁକ୍ରବାର ରାତିରେ ଗ୍ରାମବାସୀ ତାଙ୍କର କାର ସହ ଏକ କୁଇଣ୍ଟାଲ ଚାଉଳ ଜବତ କରି ଠାକୁରଗଡ଼ ପୋଲିସକୁ ହସ୍ତାନ୍ତର କରିଛନ୍ତି। ଏହି ଘଟଣା ନେଇ ଗ୍ରାମରେ ଚାପା ଉତ୍ତେଜନା ଦେଖାଦେଇଛି।
ସୂଚନା ଅନୁସାରେ, ଉକ୍ତ ବିଦ୍ୟାଳୟରେ ପୂର୍ବରୁ କିଛି ସାମଗ୍ରୀ ଚୋରି ହୋଇଥିଲା। ଗ୍ରାମବାସୀ ରାତିରେ ବିଦ୍ୟାଳୟ ଯାଞ୍ଚ କରୁଥିବା ସମୟରେ ଶୁକ୍ରବାର ରାତି ୮ଟା ସମୟରେ ପ୍ରଧାନ ଶିକ୍ଷକ ନିଜ କାରରେ ଦୁଇ ବସ୍ତା (ଏକ କୁଇଣ୍ଟାଲ) ଚାଉଳ ନେଇ ଯାଉଥିବାର ଦେଖାଯାଇଥିଲା। ଗ୍ରାମବାସୀ ପ୍ରଧାନ ଶିକ୍ଷକଙ୍କୁ ପଚାରିବାରୁ ସେ ଉତ୍ତର ଦେଇ ନଥିଲେ। କାର ଯାଞ୍ଚ କରିବା ପରେ ମଧ୍ୟାହ୍ନ ଭୋଜନ ଚାଉଳ ମିଳିବାରୁ ଗ୍ରାମରେ ଉତ୍ତେଜନା ସୃଷ୍ଟି ହୋଇଥିଲା।ଗ୍ରାମବାସୀ ଠାକୁରଗଡ଼ ପୋଲିସକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚି କାର ଓ ଚାଉଳ ଜବତ କରିବା ସହ ପ୍ରଧାନ ଶିକ୍ଷକଙ୍କୁ ଅଟକ ରଖିଛି। ଶନିବାର ଗ୍ରାମବାସୀ ଥାନାରେ ଏନେଇ ଅଭିଯୋଗ କରିବା ପାଇଁ ଯାଇଥିଲେ। କିନ୍ତୁ ଶିକ୍ଷା ବିଭାଗର ଉଚ୍ଚ ଅଧିକାରୀମାନେ ଏହି ଘଟଣାକୁ ଚାପି ଦେବା ପାଇଁ ଚାପ ପକାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଠାକୁରଗଡ଼ ଥାନା ଅଧିକାରୀ ଶଶୀ ଭୂଷଣ ବେହେରା କହିଛନ୍ତି, ‘ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି କାର, ଚାଉଳ ଜବତ କରି ପ୍ରଧାନ ଶିକ୍ଷକଙ୍କୁ ଅଟକ ରଖିଛି। ଅଭିଯୋଗ କଲେ ମାମଲା ରୁଜୁ କରାଯିବ। ଏନେଇ ଆଠମଲ୍ଲିକ ଏସଡିପିଓ ସୁଶାନ୍ତ କୁମାର ତାଉଡିଆ କହିଛନ୍ତି,’ ଉକ୍ତ ଘଟଣାକୁ ନେଇ ଷ୍ଟେସନ ଡାୟରୀ କରିବା ପାଇଁ ନିର୍ଦ୍ଦେଶ ଦିଆଯାଇଛି ‘।