ଅନୁଗୁଳ: ଅନୁଗୁଳ ଜିଲ୍ଲା ବଅଁରପାଳ ଥାନା ଗଡ଼ସନ୍ତ୍ରୀ ପଞ୍ଚାୟତର ବଡ଼ଖଳି ଗ୍ରାମରେ ବିଜୁଳି ଟ୍ରାନ୍ସଫର୍ମର ଓ ଖୁଣ୍ଟରେ ଗଛଲତା ଲାଗି ଯାଇଥିବାରୁ ଲୋକେ ବିଜୁଳି ପାଇବାରେ ହନ୍ତସନ୍ତ ହେଉଛନ୍ତି। ଅନୁଗୁଳରେ ଏଭଳି ଦୟନୀୟ ଭାବେ ଜୀବନ ବିତାଉଛନ୍ତି ସ୍ଥାନୀୟ ବଡ଼ଖଳି ଗ୍ରାମବାସୀ।
ସୂଚନା ମୁତାବକ, ବିଗତ ଏକମାସରୁ ଊର୍ଦ୍ଧ୍ଵ ସମୟ ହେବ ଗାଁରେ ହାତୀ ଉପଦ୍ରବ ବୃଦ୍ଧି ପାଇବାରେ ଲାଗିଛି। ଦନ୍ତା ଆକ୍ରମଣରେ ପ୍ରାୟ ତିନି ଜଣ ଗୁରୁତର ହୋଇଛନ୍ତି। ହାତୀ ଆସୁଥିବାରୁ ବିଦ୍ୟୁତ ବିଭାଗ ବିଜୁଳି କାଟି ଦେଉଛନ୍ତି। ଫଳରେ ଲୋକେ ହାତୀକୁ ଦେଖି ନ ପାରି ଆକ୍ରମଣର ଶିକାର ହେଉଛନ୍ତି।
ଏଠାରେ ବିଦ୍ୟୁତ ବିଭାଗର ଅପାରଗତା ଯୋଗୁ କେଉଁଠି ଖୁଣ୍ଟ ଭାଙ୍ଗି ଶୋଇ ରହୁଛି ତ ଆଉ କେଉଁଠାରେ ବିଜୁଳି ତାର ଛିଣ୍ଡି ଗ୍ରାମବାସୀ ଗୁରୁତର ହେଉଛନ୍ତି। ବଡ଼ଖଳି ଗ୍ରାମରେ ଖୁଣ୍ଟ ଆଉ ଟ୍ରାନ୍ସଫର୍ମର ଉପରେ ଲତା ଚଢ଼ି ରହିଛି। ଏଣୁ ସାଧାରଣରେ ଅସନ୍ତୋଷ ବୃଦ୍ଧି ପାଇଛି।