ରାତିରେ ଘରେ ପଶି ଦମ୍ପତିଙ୍କୁ ଦଳିଦେଲା ଦନ୍ତା; ସ୍ତ୍ରୀ ମୃତ, ସ୍ୱାମୀ ଗୁରୁତର

ଅନୁଗୁଳ: ଅନୁଗୁଳ ଜିଲ୍ଲା ତାଳଚେର ବ୍ଲକ ଅନ୍ତର୍ଗତ ସନ୍ଥପଡା ଗାଁରେ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ଘଟିଛି। ଗାଁର ଶନ୍ତରାମୁଣ୍ଡା ସାହିରେ ଦମ୍ପତିଙ୍କୁ ଏକ ଦନ୍ତା ହାତୀ ଆକ୍ରମଣ କରିଛି। ଏହି ଆକ୍ରମଣରେ ସ୍ତ୍ରୀର ମୃତ୍ୟୁ ଘଟିଥିବା ବେଳେ ସ୍ୱାମୀ ଗୁରୁତର ହୋଇଛନ୍ତି। ମୃତ ମହିଳାଙ୍କ ନାଁ କାଞ୍ଚନ ମୁଣ୍ଡା(୫୫) ଓ ତାଙ୍କ ସ୍ୱାମୀ ମୁକୁନ୍ଦ ମୁଣ୍ଡା (୬୦) ବୋଲି ଜଣାପଡ଼ିଛି l

ସୂଚନାନୁଯାୟୀ, ସୋମବାର ବିଳମ୍ବିତ ରାତିରେ ଉଭୟ ସ୍ୱାମୀ ସ୍ତ୍ରୀ ଘରେ ଶୋଇଥିବା ବେଳେ ଏକ ଦନ୍ତା ଆସି ଘରେ ପଶିଥିଲା। ସେ ପ୍ରଥମେ ମହିଳାଙ୍କୁ ଦଳି ଦେଇଥିବା ବେଳେ ସ୍ତ୍ରୀକୁ ବଞ୍ଚାଇବାକୁ ସ୍ୱାମୀ ଆସିବାରୁ ହାତୀ ତାଙ୍କୁ ମଧ୍ୟ ଆକ୍ରମଣ କରିଥିଲା। ଘଟଣାସ୍ଥଳରେ ମହିଳାଙ୍କ ମୃତ୍ୟୁ ଘଟିଛି। ସ୍ଥାନୀୟ ଲୋକେ ତାଙ୍କ ସ୍ୱାମୀଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛନ୍ତି। ଖବର ପାଇ ତାଳଚେର ପୋଲିସ ଓ ବନ ବିଭାଗ ଘଟଣା ସ୍ଥଳରେ ପହଞ୍ଚି ମୃତ ମହିଳାଙ୍କ ଶବକୁ ବ୍ୟବଚ୍ଛେଦ ପାଇଁ ସ୍ଥାନୀୟ ସରକାରୀ ଡାକ୍ତରଖାନାକୁ ପଠାଇଛନ୍ତି। ତେବେ ଦନ୍ତା ହାତୀ ଆକ୍ରମଣ ଯୋଗୁ ତାଙ୍କ ଘରଟି ସମ୍ପୂର୍ଣ୍ଣ ଭାଙ୍ଗିଯାଇଥିବାରୁ କ୍ଷତି ପୂରଣ ବାବଦକୁ ବନବିଭାଗ ୪୦ ହଜାର ଟଙ୍କାର ଚେକ୍ ପ୍ରଦାନ କରିଥିବା ଜଣାଯାଇଛି।