ଘର ଜାଳିଦେଲେ ଦୁର୍ବୃତ୍ତ, ଟେଣ୍ଟ୍‌ ହାଉସ୍ ସାମଗ୍ରୀ ପୋଡ଼ି ପାଉଁଶ

ଅନୁଗୁଳ: ବନ୍ତଳା ଥାନା ଇଲାକା ସାହାରାଗୋଡ଼ା ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ରାତିରେ ସାରା ପରିବାର ଶୋଇଥିବା ବେଳେ ଘରେ କେହି ଦୁର୍ବୃତ୍ତ ନିଆଁ ଲଗାଇ ଦେଇଛି । ଅଗ୍ନିକାଣ୍ଡରେ ଜୀବନ ବଞ୍ଚି ଯାଇଥିବା ବେଳେ ଘରେ ଥିବା ଟେଣ୍ଟ ହାଉସ୍‌ର ସମସ୍ତ ସାମଗ୍ରୀ ଜଳି ପୋଡ଼ି ପାଉଁଶ ହୋଇ ଯାଇଥିବା ଅକ୍ଷୟ ବେହେରା ଥାନାରେ ଲିଖିତ ଅଭିଯୋଗ କରିଛନ୍ତି । ସୂଚନା ମୁତାବକ, ଗୁରୁବାର ରାତିରେ ଅକ୍ଷୟଙ୍କ ପରିବାର ଲୋକ ଶୋଇଥିଲେ । ବିଳମ୍ବିତ ରାତିରେ ବାହାରେ ସାହି ଲୋକଙ୍କ ପାଟି ଶୁଣି ସେମାନେ ଜୀବନ ବଞ୍ଚାଇବାକୁ ଘର ବାହାରକୁ ଚାଲି ଆସିଥିଲେ । ଚାହୁଁ ଚାହୁଁ ତାଙ୍କ ଘର ଭସ୍ମୀଭୂତ ହୋଇଯାଇଥିଲା। ଘର ପାଖରେ ପେଟ୍ରୋଲ୍ ବୋତଲ ପଡ଼ିଥିବାରୁ କେହି ଦୁର୍ବୃତ୍ତ ଏହି ଅଗ୍ନିକାଣ୍ଡ ଘଟାଇଥିବା ଅକ୍ଷୟ ଥାନାରେ ଅଭିଯୋଗ କରିଛନ୍ତି। ଏତଲା କ୍ରମେ ପୁଲିସ୍ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଛି।