ଏଡ଼ସ ସଚେତନତା ନେଇ ମେଡିକ୍ସ୍ କାର୍ଯ୍ୟରତ

ଅନୁଗୁଳ: ଶିଳ୍ପ ସମୃଦ୍ଧ ଅନୁଗୁଳ ଜିଲ୍ଲାରେ ଏଡ଼ସ ଧିର ଗତିରେ ହେଉ ପଛେ ଏଚ୍ଆଇଭି ପଜିଟିଭ ରୋଗୀଙ୍କ ସଂଖ୍ୟା ଅନୁଗୁଳ ଜିଲ୍ଲାରେ ବଢ଼ି ଚାଲିଛି। ଗତ ଏକ ବର୍ଷ ମଧ୍ୟରେ ନୂଆ ନୂଆ ଖଣିଖାଦାନ ପାଇଁ ଅନୁଗୁଳ ଜିଲ୍ଲାରେ ଜିଲ୍ଲା ତଥା ରାଜ୍ୟ ବାହାରୁ ଲୋକଙ୍କ ଆତଯାତ ବଢ଼ି ଯାଇଛି। ଏହି ସମୟ ମଧ୍ୟରେ ବିଶେଷ କରି ଠିକା ଶ୍ରମିକ,ଟ୍ରକ୍ ଡ୍ରାଇଭର, ହେଲ୍ପରଙ୍କ ସଂଖ୍ୟା ବହୁ ଅଧିକ ଭାବରେ ବଢ଼ିଛି।

ଏଥିସହିତ ଅନୁଗୁଳ ଜିଲ୍ଲାରେ ଯୁବପିଢ଼ିଙ୍କ ମଧ୍ୟରେ ନିଶା ସେବନ,ବ୍ରାଉନ ସୁଗର୍ ସେବନ ପ୍ରକ୍ରିୟା ଅଧିକ ଦେଖିବାକୁ ମିଳୁଛି।ରାଜ୍ୟ ବାହାରୁ ଆସୁଥିବା ଟ୍ରକ୍ ଚାଳକ ମାନେ ସ୍ତ୍ରୀ ପରିବାର ଛାଡ଼ି ଦିର୍ଘ ଦିନ ବାହାରେ ରହୁଥିବାରୁ ଅସୁରକ୍ଷିତ ଯୌନ ସଂପର୍କ ରଖିବାକୁ ମନ ବଳାଉଛନ୍ତି। ଏହା ଦ୍ବାରା ଜିଲ୍ଲାରେ ଏଚ୍ଆଇଭି ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ସେହିଭଳି ଜିଲ୍ଲାରେ କିନ୍ନର ମାନେ ସଚେତନତା ତଥା ଆବଶ୍ୟକ ରୋଜଗାର ମାଧ୍ୟମ ନପାଇ ଅସୁରକ୍ଷିତ ଯୌନାଚାରରେ ଲିପ୍ତ ରହୁଛନ୍ତି ଯଦ୍ୱାରା ସମାଜରେ ଏଚ୍ଆଇଭି ବ୍ୟାପିବାରେ ସହାୟକ ହେଉଛି। ମେଡିକ୍ସ ସଂଗଠନ କିନ୍ନର ମାନଙ୍କ ସାମାଜିକ ଓ ଅର୍ଥନୈତିକ ଉନ୍ନତି ପାଇଁ ପ୍ରତିଶ୍ରୁତିବଦ୍ଧ।

ବିଭିନ୍ନ ସମୟରେ କିନ୍ନର ମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ସେମାନେ କିଭଳି ରୋଜଗାରକ୍ଷମ ହୋଇ ପରିବାର ପ୍ରତିପୋଷଣ କରି ପାରିବେ ସେଥିନେଇ ମୂଲ୍ୟବାନ ପରାମର୍ଶ ଦିଆଯାଉଛି। ସରକାରଙ୍କ ବିଭିନ୍ନ ଯୋଜନା ମାଧ୍ୟମରେ ସେମାନଙ୍କୁ ଥଇଥାନ ପାଇଁ ଉଦ୍ୟମ କରାଯାଉଛି।

ବର୍ତ୍ତମାନ ସୁଦ୍ଧା ଅନୁଗୁଳ ବ୍ଲକରେ ୫୫୬ ,ବଅଁରପାଳରେ ୪୩୨ ,ତାଳଚେରରେ ୫୩୫ ଓ ଛେଣ୍ଡିପଦାରେ ୨୫୭ ଜଣ ଏଚ୍ଆଇଭି ପଜିଟିଭ ରୋଗୀ ଥିବା ମେଡିକ୍ସ ପକ୍ଷରୁ କୁହା ଯାଇଛି। ବିଶ୍ଵ ଏଡ଼ସ ଦିବସ ପୂର୍ବରୁ ସ୍ବେଚ୍ଛାସେବୀ ସଂଗଠନ ଦି ମେଡ଼ିକ୍ସ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ସବିଶେଷ ତଥ୍ୟ ଦେଇଥିଲେ ସଂସ୍ଥାର ମୁଖ୍ୟ ନିର୍ଦ୍ଦେଶକ ଡ଼ା ଦିଲୀପ ସାମଲ।ଅନ୍ୟମାନଙ୍କ ମଧ୍ୟରେ କାର୍ଯ୍ୟକ୍ରମ ପରୀଚାଳିକା ଇତିଶ୍ରୀ ଅପରାଜିତା ପାତ୍ର ଏବଂ ପରାମର୍ଶଦାତା ସଂଘମିତ୍ରା ରାଉତ ଯୋଗ ଦେଇଥିଲେ। ଅନୁଗୁଳ ଜିଲ୍ଲାରେ ମେଡିକ୍ସ କୁ ଅଧିକ ଷ୍ଟାଫ୍ ସପୋର୍ଟ ଦିଆଗଲେ ଏଚ୍ଆଇଭି ଚିହ୍ନଟ ପ୍ରକ୍ରିୟା ଅଧିକ ସକ୍ରିୟ ଓ ସହଜ ହୋଇପାରିବ ବୋଲି କର୍ମକର୍ତ୍ତା ମାନେ ଜଣାଇଥିଲେ।