ଗୋଟିଏ ରାତିରେ ୩ ଦୋକାନରୁ ଚୋରି

ଅନୁଗୁଳୁ: ବଅଁରପାଳ ବ୍ଲକ୍ ମହୀଧରପୁର ହାଟଛକ ଇଲାକାର ୩ଟି ଦୋକାନରୁ ମଙ୍ଗଳବାର ରାତିରେ ଚୋରି ହୋଇଥିବା ଜଣାଯାଇଛି । ଏ ସଂକ୍ରାନ୍ତରେ ପୁଲିସ ନିକଟରେ ଅଭିଯୋଗ ହେବା ପରେ ପୁଲିସ ଅନୁସନ୍ଧାନ ଚଳାଇଛି । ପ୍ରକାଶଯେ, ମହୀଧରପୁର ହାଟଛକରେ ଥିବା ସୁବ୍ରତ ପ୍ରଧାନଙ୍କ ଏକ କୁକୁଡ଼ା ଫାର୍ମରୁ ୨୦ରୁ ଉର୍ଦ୍ଧ କୁକୁଡ଼ା ଏବଂ ତାଙ୍କର ଥିବା ଏକ ତେଜରାତି ଦୋକାନରୁ ସୋରିଷ ତେଲ ଏବଂ ନଗଦ ୫ ହଜାର ଟଙ୍କା ଚୋରି ହୋଇଥିବା ଏତଲାରେ ଦର୍ଶାଯାଇଛି । ସେହିପରି ତାଙ୍କ ଦୋକାନଠାରୁ ଦୁଇ ଶହ ମିଟର ଦୂରରେ ଥିବା ପ୍ରଭାତ ସାହୁଙ୍କ ଚା’ ଦୋକାନରୁ ନଗଦ ଟଙ୍କା ସହ ଗୁଟକା, ପ୍ୟାକେଟ୍ କ୍ଷୀର, ଥଣ୍ଡାପାନୀୟ ଆଦି ସାମଗ୍ରୀ ଚୋରି ହୋଇଥିବା ଅଭିଯୋଗ ହୋଇଛି । ସୁବ୍ରତ ଏବଂ ପ୍ରଭାତ ରାତି ୯ଟା ପରେ ଦୋକାନ ବନ୍ଦ କରି ଘରକୁ ଯାଇଥିଲେ । ସକାଳୁ ଆସି ଦେଖିଲା ବେଳକୁ ଦୋକାନରୁ ଚୋରି ହୋଇଥିବା ଜଣାପଡ଼ିଥିଲା । ସୁବ୍ରତଙ୍କ କୁକୁଡ଼ା ଫାର୍ମରେ ଥିବା ତାରଜାଲି ଦୁର୍ବୃତ୍ତମାନେ କାଟି ପକାଇଥିଲେ। ମହୀଧରପୁର ଫାଣ୍ଡି ପୁଲିସ ଘଟଣାର ଅନୁସନ୍ଧାନ ଚଳାଇଛି।