ଅନୁଗୁଳ: ଅନୁଗୁଳ ସଦର ଥାନା ପୁଲିସ ଶୁକ୍ରବାର ବିଳମ୍ବିତ ରାତିରେ ଏକ ଚୋରା କାଷ୍ଟ ଆଇରନ୍ ପାଇପ୍ ବୋଝେଇ ଟ୍ରକ୍କୁ ଜବତ କରିଛି। ସୂଚନା ଯେ, ସଦର ପୁଲିସ ୫୫ନଂ ଜାତୀୟ ରାଜପଥର ପଞ୍ଚମହଲାଠାରେ ପାଟ୍ରୋଲିଂ କରୁଥିବା ବେଳେ ଏକ ଟ୍ରକ୍(ଓଆର ୧୯ଜି-୧୪୮୨) ରାସ୍ତାରେ ଅଟକିଥିଲା।
ସେଥିରୁ ୨ ଜଣ ଦୌଡ଼ି ପଳାଇଥିଲେ। ସନ୍ଦେହରେ ପୁଲିସ ଟ୍ରକ୍କୁ ଯାଞ୍ଚ କରି ସେଥିରେ ପ୍ରାୟ ୩୦ଟି କାଷ୍ଟ ଆଇରନ୍ ପାଇପ୍ ଥିବା ଦେଖିବାକୁ ମିଳିଲା। ଟ୍ରକ୍ରେ ଥିବା ବନ୍ତଳା ଥାନା ଅନ୍ତର୍ଗତ ରଗୁଡ଼ିଆପଡ଼ାର ସୁକାନ୍ତ ନାଏକ(୨୫) ଓ ପୁରୁଣାଗଡ଼ର ଶୁଭମ ନାଏକ(୨୨)ଙ୍କୁ ପାଇପ୍ର କାଗଜପତ୍ର ମଗାଯାଇଥିଲା। ସେମାନେ ଉପଯୁକ୍ତ କାଗଜପତ୍ର ଦେଖାଇ ନ ପାରିବାରୁ ପୁଲିସ ଏକ ମାମଲା ରୁଜୁକରି ଟ୍ରକ୍ସହ ପାଇପ୍କୁ ଜବତ କରିଛି। ଏଥିସହ ସୁକାନ୍ତ ଓ ଶୁଭମ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଛି। ଫେରାର ଥିବା ୨ ଅଭିଯୁକ୍ତଙ୍କୁ ଖୁବ ଶିଘ୍ର ଗିରଫ କରାଯିବ ବୋଲି ଆଇଆଇସି ସତ୍ୟବ୍ରତ ରାଉତ ପ୍ରକାଶ କରିଛନ୍ତି।