ବର୍ଷ ଶେଷ ସୁଦ୍ଧା ଗଡ଼ିବ ବନ୍ଦେ ଭାରତ ସ୍ଲିପର ଟ୍ରେନ୍, ମିଳିବ ଏସବୁ ଅତ୍ୟାଧୁନିକ ସୁବିଧା

ନୂଆଦିଲ୍ଲୀ: ଚଳିତବର୍ଷ ଶେଷ ସୁଦ୍ଧା କାର୍ଯ୍ୟକ୍ଷମ ହେବ ଭାରତୀୟ ରେଳବାଇର ପ୍ରଥମ ବନ୍ଦେ ଭାରତ ସ୍ଲିପର ଟ୍ରେନ୍। ୨୦୧୯ ରେ ଆରମ୍ଭ ହୋଇଥିବା ଚେୟାର-କାର୍ ଟ୍ରେନ୍ ପରେ ଏହା ବନ୍ଦେ ଭାରତ ସିରିଜର ତୃତୀୟ ସଂସ୍କରଣ ହେବ। ଗୁଜରାଟରେ ବନ୍ଦେ ଭାରତ ସ୍ଲିପର ଟ୍ରେନର ପ୍ରଥମ ଟ୍ରେନ୍ ଚଳାଚଳ କରିବ ବୋଲି ଆଶା କରାଯାଉଛି।

ଇଣ୍ଟିଗ୍ରାଲ୍ କୋଚ୍ କାରଖାନା (ଆଇସିଏଫ୍) ଚେନ୍ନାଇର ଜେନେରାଲ୍ ମ୍ୟାନେଜର ୟୁ ସୁବା ରାଓଙ୍କ ସୂଚନାକ୍ରମେ, ବନ୍ଦେ ଭାରତର ପ୍ରଥମ ସ୍ଲିପର ଟ୍ରେନ୍ ସେପ୍ଟେମ୍ବର ୨୦ ସୁଦ୍ଧା ବେଙ୍ଗାଲୁରୁର ଭାରତ ଅର୍ଥ ମୁଭର୍ସ ଲିମିଟେଡ୍ (ବିଏମ୍ଏଲ୍) ପ୍ଲାଣ୍ଟରୁ ପ୍ରସ୍ଥାନ କରିବ ବୋଲି ଆଶା ରହିଛି। ଏହା ପରେ ଏହାର ଟ୍ରାଏଲ୍ ରନ୍ କରାଯିବ । ଏହାର ପରୀକ୍ଷା ମାସେ ଦୁଇ ମାସ ଚାଲିବ। ସେ କହିଛନ୍ତି ଯେ ହାଇ ସ୍ପିଡ୍ ଟ୍ରେନର ପରୀକ୍ଷା ଉତ୍ତର ପଶ୍ଚିମ ରେଳ ଜୋନରେ ହେବାର ସମ୍ଭାବନା ରହିଛି।

ଖବର ମୁତାବକ, ବନ୍ଦେ ଭାରତର ଚେୟାର-କାର ତୁଳନାରେ ଏହି ଟ୍ରେନର ଶବ୍ଦ କମ୍ ରହିବ। ଏହି ଟ୍ରେନରେ ଧକ୍କା ଏଡାଇବା ସିଷ୍ଟମ ‘କବଚ’ ମଧ୍ୟ ରହିବ। ଏଥିସହ ଏହାର ଷ୍ଟେନଲେସ୍ ଷ୍ଟିଲ୍ କାର୍ ବଡି, ଜିଏଫଆରପି ଇଣ୍ଟେରିୟର ପ୍ୟାନେଲ, ଏରୋଡାଇନାମିକ୍ ଡିଜାଇନ୍, ମଡ୍ୟୁଲାର୍ ପ୍ୟାଣ୍ଟ୍ରି, ଅଗ୍ନି ନିରାପତ୍ତା ନିୟମ (ଇଏନ୍45545), ଦିବ୍ୟାଙ୍ଗ ଯାତ୍ରୀଙ୍କ ପାଇଁ ସୁବିଧା, ସ୍ୱୟଂଚାଳିତ କବାଟ, ସେନ୍ସର ଆଧାରିତ ଆନ୍ତଃ ଯୋଗାଯୋଗ, ଅଗ୍ନି ପ୍ରତିବନ୍ଧକ ଦ୍ୱାର, ୟୁଏସବି ଚାର୍ଜିଂ ସହିତ ଏକ ଏର୍ଗୋନୋମିକ୍ ଟଏଲେଟ୍ ସିଷ୍ଟମ୍, ଇଣ୍ଟିଗ୍ରେଟେଡ୍ ରିଡିଂ ଲାଇଟ୍ ମଧ୍ୟ ରହିବ। ଏଥିସହ ଲାଇଟ୍ ବନ୍ଦ ଥିବା ବେଳେ ଶୌଚାଳୟକୁ ଯାଉଥିବା ଯାତ୍ରୀମାନଙ୍କ ପାଇଁ ସିଡ଼ି ତଳେ ଚଟାଣରେ ଏଲଇଡି ଷ୍ଟ୍ରିପ୍ ରହିବ। ଟ୍ରେନ୍ କର୍ମଚାରୀଙ୍କ ପାଇଁ ଏକ ଅଲଗା ବର୍ଥ ମଧ୍ୟ ରହିବ ବୋଲି ଜଣାଯାଇଛି।