ଅନୁଗୁଳ: ବୁଧବାର ରାତି ପ୍ରାୟ ଦଶଟା ସମୟରେ ଅନୁଗୁଳ ଟାଉନଥାନା ହରୀମହୁରି ଛକ ନିକଟରେ ଏକ ହତ୍ୟା କାଣ୍ଡ ଘଟି ଯାଇଛି। ଆମ୍ବୁଲାନ୍ସ ପାଉଣାକୁ କେନ୍ଦ୍ର କରି ଦୃର୍ବୁତ୍ତ ମାନେ ଦୁଇ ଭାଇଙ୍କୁ ମରଣାନ୍ତକ ଆକ୍ରମଣ କରିଥିଲେ।ଏଥିରେ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ସଙ୍କଟାପନ୍ନ ଅବସ୍ଥାରେ କଟକ ମେଡିକାଲରେ ଭର୍ତ୍ତି ହୋଇଛନ୍ତି।
ବିଶ୍ଵସ୍ତ ସୂତ୍ରରୁ ମିଳିଥିବା ଖବର ଅନୁସାରେ ଜଣେ ବ୍ୟକ୍ତି ତାଙ୍କ କୁକୁରର ଦେହ ଅସୁସ୍ଥ ଥିବାରୁ ସେ ଗୋଟିଏ ଘରୋଇ ଆମ୍ବୁଲାନ୍ସ ଯୋଗାଡ କରି ଭୁବନେଶ୍ୱର ନେଉଥିଲେ। ତେବେ ଢେଙ୍କାନାଳ ପାଖାପାଖି ଆମ୍ବୁଲାନ୍ସର ଡାଇନାମୋ ଖରାପ ହେତୁ ଗାଡ଼ି ଚାଲିପାରି ନଥିଲା। କୁକୁର ମାଲିକ ଭୁବନେଶ୍ୱରରୁ ଫେରୁଥିବା ଏକ ଆମ୍ବୁଲାନ୍ସକୁ ଅଟକାଇ କୁକୁରକୁ ସେଥିରେ ନେଇଥିଲେ ଏବଂ ଏହାର ପଇସା ପ୍ରଥମ ଆମ୍ବୁଲାନ୍ସ ମାଲିକଙ୍କୁ ଦେବାକୁ କହିଥିଲେ। ତେବେ ସନ୍ଧ୍ୟାରେ ଦ୍ଵିତୀୟ ଆମ୍ବୁଲାନ୍ସ ଚାଳକ ପଇସା ପାଇବା ପାଇଁ ପ୍ରଥମ ଆମ୍ବୁଲାନ୍ସ ମାଲିକ ସୌରଭ ବସାକଙ୍କୁ ଭେଟି ଥିଲେ। ମାତ୍ର ପଇସା ଅଧିକ କହୁଥିବା ଦର୍ଶାଇ ସେ ନିର୍ଦ୍ଧାରିତ ଅର୍ଥ ଦେଇ ନଥିଲେ ଏଥିରେ ଦ୍ୱିତୀୟ ଆମ୍ବୁଲାନ୍ସ ଚାଳକ କୁକୁର ମାଲିକଙ୍କୁ ପଇସା ଦେଉ ନଥିବା ନେଇ ଅଭିଯୋଗ କରିଥିଲେ। କୁକୁର ମାଲିକ ଏଥିରେ ଉତ୍ତ୍ୟକ୍ତ ହୋଇ ସୌରଭଙ୍କ ହରିମହୁରୀ ଛକ ସ୍ଥିତ ବାସଭବନରେ ପହଞ୍ଚି ପାଟି ତୁଣ୍ଡ କରିଥିଲେ। ଫଳରେ କୁକୁର ମାଲିକ ଏବଂ ସୌରଭଙ୍କ ମଧ୍ୟରେ ବଚସା ବଢିଥିଲା। ତେଣୁ କୁକୁର ମାଲିକ ପ୍ରଥମେ ସେଫ୍ ନାଇଫ୍ ବା ଚାଇନା ଚାପଡରେ ସୌରଭଙ୍କୁ ଆକ୍ରମଣ କରିଥିଲେ। ସୌରଭଙ୍କ ଚିତ୍କାର ଶୁଣି ତାଙ୍କ ଭାଇ ସୌଭାଗ୍ୟ ଆସି ଦୃର୍ବୁତ୍ତଙ୍କ ସହ ଲଢେ଼ଇ କରିଥିଲେ।ତେବେ ଦୃର୍ବୁତ୍ତ ମାନେ ଦୁଇ ଭାଇଙ୍କୁ ଭୟଙ୍କର ଭାବେ ଗୋଡ଼ାଇ-ଗୋଡ଼ାଇ ହାଣି ଥିଲେ।
ସ୍ଥାନୀୟ ଲୋକେ ଏବଂ ପରିବାର ସଦସ୍ୟ ପହଞ୍ଚିବା କ୍ଷଣି ଦୃର୍ବୁତ୍ତ ଫେରାର ମରିଥିଲା। ତେବେ ଏହି ହଣାକଟାରେ ଦୁର୍ବୃତ୍ତ ମାନେ ସଂଖ୍ୟାରେ ଏକାଧିକ ଥିଲେ ବୋଲି କୁହାଯାଇଛି। ଦୁଇ ଭାଇଙ୍କୁ ଅନୁଗୁଳ ଡାକ୍ତରଖାନା ପଠା ଯାଇଥିଲା।ସେମାନଙ୍କ ଅବସ୍ଥା ଗୁରୁତର ହେବାରୁ ଦୁଇ ଭାଇଙ୍କୁ କଟକ ବଡ଼ ମେଡିକାଲ ପଠାଯାଇଥିଲା।ସେଠାରେ ସାନ ଭାଇ ସୌଭାଗ୍ୟଙ୍କ ମୃତ୍ୟୁ ଘଟିଥିବା କୁହାଯାଉଛି।ତାଙ୍କର କାନ୍ଧ,ହାତ,ବେକ ଆଦିରେ ଗଭୀର କ୍ଷତ ଏବଂ ପ୍ରବଳ ରକ୍ତସ୍ରାବ ହେତୁ ମୃତ୍ୟୁ ଘଟିଥିବା କୁହା ଯାଉଛି।
ବର୍ତ୍ତମାନ ସୌରଭଙ୍କ ଅବସ୍ଥା ମଧ୍ୟ ଗମ୍ଭୀର ଅଛି। ପୋଲିସ ଖବର ପାଇ ଘଟଣାର ଛାନଭିନ କରୁଛି। ଏହାଛଡା ପୋଲିସ କିଛି ଯୁବକଙ୍କୁ ମାମଲା ନେଇ ପଚରା ଉଚରା କରୁଛି। ମେଡିକାଲ ପଛଗେଟ ସାମନାରେ କାଗଜପତ୍ର ନଥିବା ବହୁ ଅନ୍ଫିଟ ଆମ୍ବୁଲାନ୍ସ ଡେରା ପକାଉଥିବାରୁ ଅନେକ ସମୟରେ ଗଣ୍ଡଗୋଳ ଘଟୁଛି। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
