ଅନୁଗୁଳ: ଅଗ୍ନିଶମ ବିଭାଗର ସାହାଯ୍ୟ ଯୋଗୁ ବଞ୍ଚିଗଲା ଗାଈ ଜୀବନ। ମଙ୍ଗଳବାର ସକାଳେ ବିଜୁ ମଇଦାନ ଭିତର ପାଖ ଗ୍ରୀଲରେ ଚାପି ହୋଇ ରହିଥିବା ଏକ ଗାଈକୁ ଉଦ୍ଧାର କରିଛନ୍ତି ଦମକଳ ବିଭାଗର କର୍ମଚାରୀ। ଫଳରେ ଗାଈଟି ବଞ୍ଚିଯାଇଛି।
ସୂଚନା ଅନୁଯାୟୀ, ଆଜି ସକାଳେ ବିଜୁ ମଇଦାନ ଭିତର ପାଖ ଗ୍ରୀଲରେ ଏକ ଗାଈ ଚାପି ହୋଇଯାଇଥିଲା। ସ୍ଥାନୀୟ ଲୋକ ଯେତେ ଚେଷ୍ଟା କରିଥିଲେ ମଧ୍ୟ ଗାଈକୁ ବାହାର କରିପାରିନଥିଲେ। ଖବର ପାଇ ସ୍ବେଚ୍ଛାସେବୀ ଦୁଷ୍ମନ୍ତ ନାଥ ଏବଂ ଅନ୍ୟ କିଛି ସହଯୋଗୀ ଘଟଣାସ୍ଥଳରେ ପହଞ୍ଚିଥିଲେ। କିନ୍ତୁ ସେମାନେ ବି ଗାଈକୁ ଉଦ୍ଧାର କରିବାରେ ଅସମର୍ଥ ହୋଇଥିଲେ। ପରେ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ଦମକଳ ବିଭାଗର କର୍ମଚାରୀମାନେ ପହଞ୍ଚି ହାଇଡ୍ରୋଲିକ କଟର ସାହାଯ୍ୟରେ ଗେଟ୍କୁ କାଟି ଗାଈକୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି।
ପ୍ରକାଶ ଯେ ଅନୁଗୁଳ ସହରରେ କାଞ୍ଜିଆହୁଦା ନଥିବାରୁ ବୁଲା ଗାଈଗୋରୁଙ୍କ ପାଦୁର୍ଭାବ ବଢ଼ିବାରେ ଲାଗିଛି। ସହରର ବ୍ୟବସାୟୀ ଙ୍କ ଠାରୁ ଆରମ୍ଭ କରି ସାଧାରଣ ଜନତା ପର୍ଯ୍ୟନ୍ତ ସମସ୍ତେ ଅସ୍ତବ୍ୟସ୍ତ ହୋଇପଡ଼ିଥିବା ଦେଖିବାକୁ ମିଳିଛି।
