ଅନୁଗୁଳ: ତୀର୍ଥଯାତ୍ରୀ ବସ୍ ଦୁର୍ଘଟଣାଗ୍ରସ୍ତ। ଅନୁଗୁଳ ଜିଲ୍ଲା ବଅଁରପାଳ ଥାନା ଅନ୍ତର୍ଗତ ମହୀଧରପୁର ଖନ୍ଦାନାଳୀ ବାଙ୍କ ନିକଟରେ ସୋମବାର ଭୋର ସମୟରେ ଚକାଡୋଳା ବସ ଦୁର୍ଘଟଣାଗ୍ରସ୍ତ ହୋଇଛି। ସୌଭାଗ୍ୟବଶତଃ ଏଥିରେ ଥିବା ୪୬ ଜଣ ତୀର୍ଥଯାତ୍ରୀ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନା ମୁତାବକ, କଟକରୁ ଏହି ବସଟି ଗତ କାଲି ହରିଶଙ୍କର ଯାଇଥିଲା। ଅନୁଗୁଳରୁ ମହୀଧରପୁର ଦେଇ କଟକ ଫେରୁଥିବା ବେଳେ ଖନ୍ଦାନାଳୀ ବାଙ୍କ ନିକଟରେ ମୋଡ଼ ନେବା ବେଳେ ବସଟି ଭାରସାମ୍ୟ ହରାଇ ୬ଟି ଗଛରେ ପିଟିହୋଇ ହୋଇ କଲଭର୍ଟ ଉପରେ ଚଢ଼ି ଯାଇଥିଲା। ଫଳରେ ଯାତ୍ରୀମାନେ ଅଳ୍ପକେ ବର୍ତ୍ତି ଯାଇଛନ୍ତି। ବସର ସାମ୍ନା ପଟ ସମ୍ପୂର୍ଣ୍ଣ ଭାଙ୍ଗି ଯାଇଛି। ସାମାନ୍ୟ ଆହତ ହୋଇଥିବା ଯାତ୍ରୀମାନେ ଅନୁଗୁଳ ଡାକ୍ତରଖାନାରେ ଚିକିତ୍ସିତ ହୋଇ ଅନ୍ୟ ଏକ ଗାଡ଼ିରେ ଘରକୁ ଫେରିଥିବା ପୋଲିସ ସୂଚନା ଦେଇଛି।
ଖବର ପାଇ ମହୀଧରପୁର ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି କ୍ରେନ୍ ସାହାଯ୍ୟରେ ଗାଡ଼ିକୁ ବାହାର କରି ଘଟଣାର ତଦନ୍ତ କରୁଛି।
ଅନ୍ୟପଟେ ଏହି ବୁଲାଣି ପାଖରେ ହମ୍ପସ ନ ଥିବାରୁ ୫ ବର୍ଷ ଭିତରେ ୨୦୦ ରୁ ଅଧିକ ଦୁର୍ଘଟଣା ଘଟି ସାରିଲାଣି। ଏହା ସହିତ ୯ ଜଣଙ୍କ ମୃତ୍ୟୁ ବି ଘଟିଛି। ଏଣୁ ଏଠାରେ ତୁରନ୍ତ ହମ୍ପସ କରିବା ପାଇଁ ଗ୍ରାମବାସୀ ଦାବି କରିଛନ୍ତି।
