ଅନୁଗୁଳ: ସ୍ଥାନୀୟ ସାନକଞ୍ଜନୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଦୀର୍ଘ ଦିନ ହେଲା ଲାଗି ରହିଥିବା ଶିକ୍ଷକ ସମସ୍ୟାକୁ ତୁରନ୍ତ ସମାଧାନ କରିବା ଲାଗି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି ଛାତ୍ରଛାତ୍ରୀ ଓ ଗ୍ରାମବାସୀ।
ଅଭିଯୋଗ ମୁତାବକ, ୧୯୮୨ ମସିହା ଠାରୁ ୬ଷ୍ଠ ଓ ୭ମ ଶ୍ରେଣୀକୁ ନେଇ ଏହି ସ୍କୁଲ ସ୍ଥାପନ ହୋଇଛି। ୫ ହଜାର ଜନସଂଖ୍ୟା ବିଶିଷ୍ଟ ବଡକଞ୍ଜନୀ, ସାନକଞ୍ଜନୀ, ନୂଆପଡ଼ା, ସଟରାଙ୍ଗ, ସାରଙ୍ଗପୁର ପ୍ରଭୃତି ପାଞ୍ଚଟି ଗ୍ରାମର ଛାତ୍ରଛାତ୍ରୀ ପାଠ ପଢିବା ପାଇଁ ଜନସାଧାରଣଙ୍କ ସହଯୋଗରେ ଏହି ବିଦ୍ୟାଳୟ ତିଆରି ହୋଇଥିଲା। ବର୍ତ୍ତମାନ ସ୍କୁଲରେ ୬ଷ୍ଠ ଓ ୭ମ ଶ୍ରେଣୀରେ ୬୧ ଜଣ ଛାତ୍ରଛାତ୍ରୀ ନାମ ଲେଖିଛନ୍ତି।
ଅନ୍ୟପଟେ ୨୦୨୨ ଏପ୍ରିଲ ଠାରୁ ସମସ୍ତ ଶିକ୍ଷକ ଓ ଶିକ୍ଷୟିତ୍ରୀ ଅବସର ଗ୍ରହଣ କରିଛନ୍ତି। ଫଳରେ ପ୍ରାୟ ୬ ମାସ ହେବ ବିଦ୍ୟାଳୟ କୌଣସି ଶିକ୍ଷକ ନଥିବାରୁ ଶିକ୍ଷାଦାନ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଏହି ବିଦ୍ୟାଳୟ ଠାରୁ ନିକଟବର୍ତ୍ତୀ ବିଦ୍ୟାଳୟର ଦୂରତା ପ୍ରାୟ ୫ ରୁ ୭ କିମି ହୋଇଥିବାରୁ ପିଲାମାନେ ସେଠାକୁ ଯାଇ ପଢିପାରୁନାହାନ୍ତି। ଫଳରେ ପାଠ ପଢା ଛାଡିବାକୁ ବାଧ୍ୟ ହେଉଛନ୍ତି। ଏଣୁ ଏହି ସ୍କୁଲରେ ପୁନଃ ଶିକ୍ଷକ ଶିକ୍ଷୟିତ୍ରୀ ନିଯୁକ୍ତ କରାଯାଇ ବିଦ୍ୟାଳୟକୁ ଚଳାଇବା ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗାଁ ଲୋକେ ଗଣଧାରଣା ଦେଇଛନ୍ତି।
