ଅନୁଗୁଳ: ସକାଳର ସେହି ଗରମ ଚା’ କପ୍ ସାଙ୍ଗକୁ ଟିକେ ଗପସପ, କାହା ପାଇଁ ଏହା ସମୟ ଅତିବାହିତ କରିବାର ମାଧ୍ୟମ ତ କାହା ପାଇଁ ଜ୍ଞାନ ଆହରଣର ପାଠଶାଳା। ଓଡ଼ିଆ ସଂସ୍କୃତିର ଏହି ଅବିଚ୍ଛେଦ୍ୟ ଅଙ୍ଗ ‘ଖଟି’କୁ ଏକ ନୂଆ ପରିଚୟ ଦେବା ପାଇଁ ଆଜି ଅନୁଗୁଳ ସହରରେ ପାଳିତ ହୋଇଯାଇଛି ପ୍ରଥମ “ବିଶ୍ୱ ଚା’ ଖଟି ଦିବସ”।
ଅନୁଗୁଳ ଅମାଳପଡ଼ା ସ୍ଥିତ ନରେଶ ଭାଇଙ୍କ ଟି-ଷ୍ଟଲ୍ ଆଜି କେବଳ ଏକ ଚା’ ଦୋକାନ ହୋଇ ରହିନଥିଲା, ବରଂ ପାଲଟିଥିଲା ବୌଦ୍ଧିକ ଚର୍ଚ୍ଚାର ଏକ ମୁକ୍ତ ମଞ୍ଚ। ୨୦୨୬ ଏପ୍ରିଲ ଦ୍ୱିତୀୟ ରବିବାରକୁ ଏହି ନିଆରା ଦିବସ ଭାବେ ବାଛି ନିଆଯାଇଥିବା ବେଳେ, ସହରର ବହୁ ବୁଦ୍ଧିଜୀବୀ, ଯୁବପିଢ଼ି ଓ ସାଧାରଣ ଜନତା ଏଥିରେ ସାମିଲ ହୋଇଥିଲେ।
ରାଜନୀତିରୁ ରଣନୀତି, ଆଉ ସାହିତ୍ୟରୁ ସମାଜସେବା— ଚା’ର ପ୍ରତିଟି ଚୁମୁକିରେ ଜ୍ଞାନର ଆଦାନପ୍ରଦାନ ଦେଖିବାକୁ ମିଳିଥିଲା। ଖଟି କେବଳ ଗପସପ ନୁହେଁ, ବରଂ ଏହା କିଭଳି ସାମାଜିକ ଜ୍ଞାନ ନିର୍ମାଣରେ ସହାୟକ ହୁଏ, ସେ ନେଇ ଉପସ୍ଥିତ ବୁଦ୍ଧିଜୀବୀମାନେ ମତ ରଖିଥିଲେ। ଛୋଟଠାରୁ ବଡ଼, ସବୁ ବର୍ଗର ଲୋକେ ଏକାଠି ବସି ଭାଇଚାରାର ବାର୍ତ୍ତା ବାଣ୍ଟିବା ସହ ଏହି ପରମ୍ପରାକୁ ସୃଜନଶୀଳ ଦିଗରେ ବ୍ୟବହାର କରିବାକୁ ସଂକଳ୍ପ ନେଇଥିଲେ।
ଏହି ଅବସରରେ ସମୟର ସଦୁପଯୋଗ ଓ ସୁସ୍ଥ ଆଲୋଚନା ଉପରେ ଗୁରୁତ୍ୱ ଦିଆଯାଇଥିଲା। ଅନୁଗୁଳରୁ ଆରମ୍ଭ ହୋଇଥିବା ଏହି ଅଫ୍-ବିଟ୍ ପ୍ରୟାସ ଆଗାମୀ ଦିନରେ ‘ଖଟି’ ସଂସ୍କୃତିକୁ ଏକ ବୌଦ୍ଧିକ ଗୌରବ ପ୍ରଦାନ କରିବ ବୋଲି ଆଶା କରାଯାଉଛି।
