ଅନୁଗୁଳ: କିଶୋରନଗର ବ୍ଳକ୍ ତଥା ହଣ୍ଡପା ଥାନା ଇଲାକାର ଗୁଣ୍ଡୁରୀମୁଣ୍ଡା ଗ୍ରାମରେ କୋଇଲା ଡିପୋକୁ ସ୍ଥାନୀୟ ଅଧିବାସୀ ବିରୋଧ କରି ଆସୁଛନ୍ତି । ଗତ ଡିସେମ୍ବର ୩ ତାରିଖରେ ଡିପୋ ସ୍ଥାନାନ୍ତର ଦାବିରେ ଗ୍ରାମବାସୀ ଧାରଣାରେ ବସିଥିବା ବେଳେ ସେମାନଙ୍କୁ ଭୟଭୀତ କରିବାକୁ ଦୁର୍ବୃତ୍ତମାନେ ଫାଙ୍କା ଗୁଳିଚାଳନା କରିଥିଲେ। ପୁଲିସ ଦୁଇ ଜଣଙ୍କୁ ଗିରଫ କରିଥିବା ବେଳେ ଅନ୍ୟ ୪ ଜଣ ଫେରାର୍ ହୋଇଯାଇଥିଲେ । ହଣ୍ଡପା ଥାନା ଓ ବଇଣ୍ଡା ଫାଣ୍ଡି ପୁଲିସ ଆଉ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି । ଦୁଇ ଅଭିଯୁକ୍ତ ନୁନୁକାପଶି ଗ୍ରାମର ଲୁଲୁ ସାହୁ ଓ ହଣ୍ଡପା ଗ୍ରାମର ପଦ୍ମଚରଣ ସାହୁଙ୍କୁ ପୁଲିସ ଗିରଫ କରି ଗୁରୁବାର କୋର୍ଟଚାଲାଣ କରିଛି । ସୂଚନାଯୋଗ୍ୟ, କୋଲକତାର ଏକ ଠିକାସଂସ୍ଥା ଏମ୍ଏମ୍ ଲଜିଷ୍ଟିକ ହଣ୍ଡପା ରେଳଷ୍ଟେସନଠାରେ କୋଇଲା ଡମ୍ପିଂୟାର୍ଡ଼ ନିର୍ମାଣ କରିଛି । ହେଲେ ଗୁଣ୍ଡୁରିମୁଣ୍ଡା ଗ୍ରାମବାସୀଙ୍କ ସହିତ ୮ଟି ପଞ୍ଚାୟତବାସୀ ଏହାକୁ ବିରୋଧ କରିବା ସହ ଗତ ଜୁନ୍ ୧୨ ତାରିଖଠାରୁ ଅହୋରାତ୍ର ଗଣଧାରଣା ଚଳାଇଥିଲେ। ଗତ ଡିସେମ୍ବର ୩ ତାରିଖ ଅପରାହ୍ନରେ ୩ଟି ବାଇକ୍ରେ ୬ ଜଣ ଦୁର୍ବୃତ୍ତ ଆସି ଫାଙ୍କା ଗୁଳିଚାଳନା କରିଥିଲେ । ଦୁଇ ରାଉଣ୍ଡ ଗୁଳି ଫୁଟିଥିବା ବେଳେ ଦୁଇ ଜଣ ଅଭିଯୁକ୍ତଙ୍କୁ ପୁଲିସ କାବୁ କରିବାରେ ସଫଳ ହୋଇଥିଲା।
