ଅନୁଗୁଳ: ଅନୁଗୁଳ ସହରକୁ ପରିବା ବିକ୍ରି କରିବାକୁ ଆସୁଥିବା ଲୋକଙ୍କୁ ମାରଣାସ୍ତ୍ର ଦେଖାଇ ଟଙ୍କା ଲୁଟ୍ ଅଭିଯୋଗରେ ଟାଉନ୍ ଥାନା ପୁଲିସ ୨ ଜଣଙ୍କୁ ଗିରଫ କରିଛି। ସୂଚନା ଅନୁସାରେ, ଜରପଡ଼ା ଅଞ୍ଚଳରୁ ଲୋକମାନେ ଅନୁଗୁଳକୁ ପରିବା ନେଇ ଆସିଥାନ୍ତି। ବୁଧବାର ରାତିରେ ଜଣେ ଚାଷୀ ପରିବା ଆସୁଥିବା ସମୟରେ ହୁଲୁରିସିଂହା ଠାରେ ୩ ଜଣ ଦୁର୍ବୃତ୍ତ ତାଙ୍କୁ ଅଟକାଇ ବିଭିନ୍ନ ଧମକଚବକ ଦେଇ ତାଙ୍କ ପାଖରେ ଥିବା ୧ ହଜାର ଟଙ୍କା ଛଡ଼ାଇ ନେଉଥିଲେ। ଏହି ସମୟରେ ପୁଲିସ ପାଟ୍ରୋଲିଂ ଭ୍ୟାନ ପହଞ୍ଚିବାରୁ ଜଣେ ଫେରାର୍ ହୋଇଯାଇଥିଲା ବେଳେ ପୁଲିସ ହାବୁଡ଼ରେ ୨ ଜଣ ପଡ଼ିଥିଲେ। ସେମାନେ ହେଲେ ହୁଲୁରିସିଂହା ଘାସି ସାହିର ପ୍ରଭାସ ମୁଖି ଓ ରୋହିତ ମୁଖି। ପୁଲିସ ସେମାନଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି।
