ପ୍ରଧାନମନ୍ତ୍ରୀ ହେବା ପରେ ମୋଦିଙ୍କ ପ୍ରଥମ ଦସ୍ତଖତ, ‘ପିଏମ୍ କିସାନ ନିଧି’ରେ ଚାଷୀଙ୍କ ପାଇଁ ଜାରି କଲେ ୨୦ ହଜାର କୋଟି ଟଙ୍କା
ନୂଆଦିଲ୍ଲୀ : ତୃତୀୟ ଥର ପାଇଁ ଦେଶର ପ୍ରଧାନମନ୍ତ୍ରୀ ଭାବେ ଶପଥ ନେଇଛନ୍ତି ନରେନ୍ଦ୍ର ମୋଦି। ଆଉ କୃଷକଙ୍କ କଲ୍ୟାଣ ନିମନ୍ତେ ନିଜର ପ୍ରଥମ ଫାଇଲ୍ ଦସ୍ତଖତ କରିଛନ୍ତି । ପ୍ରଧାନମନ୍ତ୍ରୀ ‘ପିଏମ୍ କିସାନ ନିଧି’ର ୧୭ତମ କିସ୍ତିରେ ୨୦ ହଜାର କୋଟି ଟଙ୍କା ଜାରି କରିଛନ୍ତି । ମୋଦିଙ୍କର ଏହି ନିଷ୍ପତ୍ତି ଦ୍ୱାରା ୯.୩ କୋଟି ଚାଷୀ ଉପକୃତ ହେବେ ।
ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଆମ ସରକାର କୃଷକଙ୍କ କଲ୍ୟାଣ ପାଇଁ ସମ୍ପୂର୍ଣ୍ଣ ଭାବେ ଉତ୍ସର୍ଗୀକୃତ । ତେଣୁ କାର୍ଯ୍ୟଭାର ସମ୍ଭାଳିବା ପରେ ମୋର ପ୍ରଥମ ଫାଇଲ କୃଷକଙ୍କ କଲ୍ୟାଣ ସହ ଜଡିତ ରହୁ । ଆଗାମୀ ସମୟରେ କୃଷକ ଏବଂ କୃଷି କ୍ଷେତ୍ର ପାଇଁ ଆମ ସରକାର ଆହୁରି ବି ଅଧିକ କାର୍ଯ୍ୟ କରିବାକୁ ଚାହୁଁଛନ୍ତି ।
କହି ରଖୁଛୁ ଯେ ‘ପିଏମ୍ କିସାନ ନିଧି’ର ୧୭ତମ କିସ୍ତିରେ ଜାରି କରାଯାଇଥିବା ୨୦,୦୦୦ କୋଟି ଟଙ୍କା କୃଷକମାନଙ୍କୁ ସିଧାସଳଖ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଦିଆଯିବ ।
ଏଥିପାଇଁ ଆପଣଙ୍କୁ ପିଏମ୍ କିସାନ ପୋର୍ଟାଲ https://pmkisan.gov.in/ ଭିଜିଟ୍ କରିବାକୁ ପଡିବ । ପ୍ରଧାନମନ୍ତ୍ରୀ କିସାନ ଯୋଜନା ଅଧୀନରେ e-KYC କରିବା ମଧ୍ୟ ବାଧ୍ୟତାମୂଳକ ।
