ଅନୁଗୁଳ: ଅନୁଗୁଳ ଜିଲ୍ଲା ବନ୍ତଳା ଥାନା ବଡ଼କନ୍ତକୁଳ ପଞ୍ଚାୟତ ଅନ୍ତର୍ଗତ କଂଜା ଗ୍ରାମରେ ମାତିଛି ପାଗଳ କୁକୁର। ଯାହାକୁ ଦେଖୁଛି ଗୋଡ଼େଇ ଗୋଡ଼େଇ କାମୁଡୁଛି। ଏଥିରେ ଗୁରୁତର ହୋଇଛନ୍ତି ୭ ଜଣ। ଗୁରୁତରଙ୍କୁ ପ୍ରଥମେ ବନ୍ତଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।

ରବିବାର ସକାଳ ପ୍ରାୟ ୧୦ଟାରୁ ଆରମ୍ଭ ହୋଇଥିଲା କୁକୁର ଆତଙ୍କ। ଏକ କୁକୁର କଂଜା ଗାଁ ଆଡକୁ ଆସୁଥିବା ବେଳେ ବାଟରେ ଯାହାକୁ ଦେଖିଲା ଗୋଡେଇ ଗୋଡେଇ କାମୁଡ଼ିଥିଲା। କୁକୁରଟି ଛୋଟ ଛୁଆ ଠାରୁ ବୟସ୍କ ଲୋକ ସମସ୍ତଙ୍କୁ କାମୁଡି ଚାଲିଲା। ଜଣେ ମହିଳାଙ୍କ ମୁଣ୍ଡ, ଗୋଡ଼, ହାତ ଦେହ ସବୁଠି ଆଘାତ ଲାଗିଥିବା ବେଳେ ସେ ଲହୁଲୁହାଣ ହୋଇପଡିଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରିଥିଲେ। ଗାଁରେ ପ୍ରାୟ ୭ ଜଣଙ୍କୁ ଏହି କୁକୁର କାମୁଡି କ୍ଷତାକ୍ତ କରିପକାଇଥିବା ଗ୍ରାମବାସୀ ଅଭିଯୋଗ ଆଣିଛନ୍ତି। ଗ୍ରାମର ଧରଣୀ ସାହୁ(୫୫), ଯଦୁ ଗୋଛୟତ(୨୬), ଶୁଭ୍ରାଂଶୁ ବିଶୋଇ(୧୦), ବାବୁଲି ଦେହୁରୀ(୧୯), ବିନୋଦିନୀ ସାହୁ(୩୨), ରାଇଜରାଣି ବିଶ୍ୱାଳ(୭୫) ଓ ମାଳତୀ ସାହୁ(୫୫) କୁକୁର କାମୁଡ଼ାରେ ଗୁରୁତର ହୋଇଛନ୍ତି। ଗୁରୁତରଙ୍କୁ ପ୍ରାଥମିକ ଚିକିତ୍ସା ପାଇଁ ପ୍ରଥମେ ବନ୍ତଳା ମେଡିକାଲ ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସମସ୍ତଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି।