ଜିନ୍ଦଲ ପ୍ଲାଣ୍ଟରୁ ଚୋରି ଉଦ୍ୟମ ବେଳେ ମାଡ଼ି ବସିଲେ ସୁରକ୍ଷାକର୍ମୀ, ୨୦୦ କେଜିରୁ ଊର୍ଦ୍ଧ୍ୱ ଲୁହା ରଡ଼ ଜବତ

ଛେଣ୍ଡିପଦା: ଜିନ୍ଦଲ ପ୍ଲାଣ୍ଟ ପରିସରରୁ ଚୋରି କରିବା ଅଭିଯୋଗରେ ନିଶା ଶିଳାଞ୍ଚଳ ପୋଲିସ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତ ତାଳଚେର ଡଅଁରା ଗ୍ରାମର ଦୀପନ କୁମାର ସାହୁକୁ (ହାଡୁ) ବୋଲି ଜଣାଯାଇଛି।
ପୋଲିସ ସୂଚନା ଅନୁସାରେ, ସୋମବାର ବିଳମ୍ବିତ ରାତିରେ ଦୀପନ ପ୍ଲାଣ୍ଟରେ ଗଚ୍ଛିତ ଥିବା ୨୦୦ କେଜିରୁ ଊର୍ଦ୍ଧ୍ୱ ଲୁହା ରଡ଼କୁ ପାଚେରୀ ବାହାରକୁ ପକାଇ ଥିଲା। କିନ୍ତୁ ସୁରକ୍ଷା ଦାୟିତ୍ୱରେ ଥିବା କର୍ମଚାରୀମାନେ ଏହା ଜାଣି ପାରି ଲୁହା ରଡ଼ ସହିତ ଦୀପନକୁ କାବୁ କରି ନେଇଥିଲେ।
କମ୍ପାନୀ କର୍ତ୍ତୃପକ୍ଷ ଏ ସମ୍ପର୍କରେ ନିଶା ଶିଳାଞ୍ଚଳ ଥାନାରେ ଲିଖିତ ଅଭିଯୋଗ କରିବା ସହିତ ଦୀପନକୁ ପୋଲିସକୁ ହସ୍ତାନ୍ତର କରିଥିଲେ। ପୋଲିସ ଅଭିଯୋଗ ଆଧାରରେ ଏକ ମାମଲା ରୁଜୁ କରି ଦୀପନକୁ ଗିରଫ କରି କୋର୍ଟ ଚାଲାଣ କରିଛି।