ଅନୁଗୁଳ: ଅନୁଗୁଳ ସଦର ପୋଲିସ ୩ଟି ଚୋରି ଘଟଣାରେ ସମ୍ପୃକ୍ତ ୩ ଜଣ ଅଭିଯୁକ୍ତଙ୍କୁ ଗୁରୁବାର ଗିରଫକରି କୋର୍ଟ ଚାଲାଣ କରିଛି। ସୂଚନା ମୁତାବକ, ୨୨ ତାରିଖ ରାତିରେ ପଞ୍ଚମହଲାଠାରେ ଥିବା ଅନୁଗୁଳ ପୌର ଆବର୍ଜନା ପରିଚାଳନା ପ୍ରକଳ୍ପ ପରିସରରୁ ୩ଟି ପାଣି ପମ୍ପ ଚୋରି ହୋଇଥିଲା। ଏ ନେଇ ଥାନାରେ ଅଭିଯୋଗ ହେବାପରେ ପୋଲିସ ଏକ ମାମଲା ରୁଜୁକରିଥିଲା। ସେହିଭଳି ୨୩ ତାରିଖ ରାତିରେ ରନ୍ତଲୋଇ ଗାଁର ଅଭିଜିତ ନାଏକଙ୍କ ଘରୁ ଏକ ପାଣିପମ୍ପ ଚୋରି ହୋଇଥିଲା। ଏ ନେଇ ମଧ୍ୟ ଥାନାରେ ମାମଲା ରୁଜୁ ହୋଇଥିଲା। ବୁଧବାର ରାତିରେ ରନ୍ତଲୋଇ ଗାଁର ଗିରିଧାରୀ ପ୍ରଧାନଙ୍କ ଘରୁ ଏକ ମୋବାଇଲ ଫୋନ୍ ଚୋରି ହୋଇଥିଲା। ଏ ନେଇ ମଧ୍ୟ ମାମଲା ରୁଜୁ ହୋଇଥିଲା। ଏହି ଘଟଣାର ତଦନ୍ତକରି ପୋଲିସ ପଞ୍ଚମହଲା ଭେରୁବଣିଆସାହିର ଆଶିଷ ନାଏକ(୨୩), ଶିବାନୀ ପଲେଇ(୧୯) ଓ ଯୋଗେଶ ସାହୁ(୨୨)ଙ୍କୁ ଗିରଫ କରିବା ସହ ସେମାନଙ୍କଠାରୁ ଗୋଟିଏ ପାଣିପମ୍ପ ଓ ଗୋଟିଏ ମୋବାଇଲ ଫୋନ୍ ଜବତ କରିଛି। ଅଭିଯୁକ୍ତମାନଙ୍କୁ ଗୁରୁବାର କୋର୍ଟ ଚାଲାଣ କରିଛି। ତେବେ ଚୋରି ହୋଇଥିବା ଅନ୍ୟ ପାଣି ପମ୍ପର ସନ୍ଧାନ କରୁଛି ପୋଲିସ।
