ଅନୁଗୁଳ: ଅନୁଗୁଳ ଜିଲ୍ଲା ପ୍ରତିଷ୍ଠା ଦିବସ ଅବସରରେ ଏଟିଭି ପକ୍ଷରୁ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ସ୍ଥାନୀୟ ବାସନ୍ତୀ ପାଠାଗାର ପରିସରରେ ଆୟୋଜିତ ଏହି ଆଲୋଚନାଚକ୍ରରେ ସଂସ୍ଥାର ପ୍ରତିଷ୍ଠାତା ରାଜେନ୍ଦ୍ର ସାମଲଙ୍କ ଫଟୋ ଚିତ୍ରରେ ମାଲ୍ୟାର୍ପଣ କରି ସମାରୋହକୁ ଉଦଘାଟନ କରିଥିଲେ ଅନୁଗୁଳ ପୌର ନିର୍ବାହୀ ଅଧିକାରୀ ସତ୍ୟପ୍ରକାଶ ତ୍ରିପାଠୀ। ମୁଖ୍ୟ ଅତିଥି ଶ୍ରୀ ତ୍ରିପାଠୀ ଅନୁଗୁଳ ପୌରପାଳିକା ଚଳିତ ଆର୍ଥିକ ବର୍ଷରେ ୮୫ ପ୍ରତିଶତ ଟିକସ ଆଦାୟ କରି ରେକର୍ଡ କରିଥିବା ପ୍ରକାଶ କରିଥିଲେ। ଅନୁଗୁଳର ପରିମଳ ଅବସ୍ଥାରେ ସୁଧାର ଆଣିବା ସହ ଏକ ସ୍ୱଚ୍ଛ ଅନୁଗୁଳ ଗଠନ ଦିଗରେ ସେ କାର୍ଯ୍ୟ କରିବେ ବୋଲି ପ୍ରକାଶ କରିଥିଲେ।
ଶିକ୍ଷାବିତ ତଥା ଆଦର୍ଶ ଗ୍ରୁପର ଅଧ୍ୟକ୍ଷ ମହେଶ ଧଳ ଯୋଗ ଦେଇ ଅନୁଗୁଳରେ ରିଙ୍ଗ ରୋଡ଼ର ଆବଶ୍ୟକତା ଉପରେ ମତ ବ୍ୟକ୍ତ କରିଥିଲେ। ଅନ୍ୟତମ ସମ୍ମାନିତ ଅତିଥି ରୂପେ ଯୋଗ ଦେଇ ଓଡିଶା ଲୟର୍ସ ଆସୋସିଏସନର ସହ ଅଧ୍ୟକ୍ଷ ଭୂପେଶ ଚନ୍ଦ୍ର ପ୍ରଧାନ ଏବଂ ଅନୁଗୁଳ ଜିଲ୍ଲା ଟ୍ରକ ମାଲିକ ସଙ୍ଘ ସଭାପତି ଅମରେଶ ସ୍ୱାଇଁ ଯୋଗ ଦେଇ ଅନୁଗୁଳ ଜିଲ୍ଲାର ସାମଗ୍ରିକ ବିକାଶ ପାଇଁ ପ୍ରଶାସନର ଦାୟିତ୍ୱ ସାଙ୍ଗକୁ ଜନ ସମୁଦାୟର ସହଯୋଗ ନିତାନ୍ତ ଆବଶ୍ୟକ ବୋଲି କହିଥିଲେ। ସ୍ୱଚ୍ଛ ସମୃଦ୍ଧ ଅନୁଗୁଳ ଆଉ କେତେ ଦୂର ଶୀର୍ଷକ ଆଲୋଚନା ଉପରେ ଭାଗ ନେଇ ଅନୁଗୁଳର ବହୁ ଗଣ ମାନ୍ୟ ବ୍ୟକ୍ତି ଜିଲ୍ଲାର ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି, ପରିବେଶ ସୁରକ୍ଷା, ଟ୍ରାଫିକ ବ୍ୟବସ୍ଥା, ବ୍ୟାପକ ବୃକ୍ଷ ରୋପଣ ଏବଂ ଅତ୍ୟାଧୁନିକ ସ୍ୱାସ୍ଥ୍ୟ ସେବା ପାଇଁ ଉଚ୍ଚତର ଭିତ୍ତିଭୂମିର ଆବଶ୍ୟକତା ଉପରେ ଆଲୋଚନା କରିଥିଲେ।
ଏଟିଭିର ନିର୍ଦେଶକ ରାକେଶ ସାମଲଙ୍କ ସଭାପତିତ୍ବ ରେ ଆୟୋଜିତ ଏହି ବୈଠକରେ ବିଶ୍ୱରଞ୍ଜନ ପଟନାୟକ ଅତିଥି ପରିଚୟ ଓ ସ୍ୱାଗତ ଭାଷଣ ଦେଇଥିଲେ। ସମାରୋହରେ ଶିକ୍ଷାବିତ ମହେଶ ଚନ୍ଦ୍ର ଧଳ, ଟ୍ରକ ମାଲିକ ସଂଘ ସଭାପତି ଅମରେଶ ସ୍ୱାଇଁ ଏବଂ ଟାଇକୁଣ୍ଡୁ ଖେଳାଳି ତପସ୍ୱିନୀ ପ୍ରଧାନଙ୍କୁ ମୁଖ୍ୟ ଅତିଥି ସମ୍ବର୍ଦ୍ଧିତ କରିଥିଲେ। ଦୁଷ୍ୟନ୍ତ କୁମାର ନାଥ ବେଦ ପାଠ କରିଥିବାବେଳେ ବାସନ୍ତୀ ଦୁର୍ଗାପୂଜା କମିଟିର ସଭାପତି ଶକ୍ତି ପ୍ରସାଦ ପଟନାୟକ ଏବଂ ତାଙ୍କ କର୍ମକର୍ତା କାର୍ଯ୍ୟକ୍ରମ ପରିଚାଳନା ରେ ସହଯୋଗ କରିଥିଲେ। ଅନୁଗୁଳ ଏଡିଭିର ସଭାପତି ଅନିଲ ମହାନ୍ତି, ପବନ ମାନଡୋଠିଆ, ଦେବାଶିଷ ପଟନାୟକ, ଆଡ଼ଭୋକେଟ ଦିଲୀପ ସାହୁ, କଂଗ୍ରେସ ନେତା ସୁନୀଲ ପ୍ରଧାନ, ସୁଦିପ ମିଶ୍ର,ଲକ୍ଷ୍ମଣ ଅଗ୍ରୱାଲ, ମାନସ ପାଲ, ନବ କିଶୋର ପ୍ରଧାନ, ପୂର୍ବତନ ନଗରପାଳ ଭକ୍ତି ପ୍ରସାଦ ଦାସ, ବିଜେଡି ନେତା ଦିନେଶ ପ୍ରଧାନ, ସଂଜୀବ ମାଣ୍ଡୋଠିଆ, ରଂଜିତ ଜେନା ପ୍ରମୁଖ ଆଲୋଚନା ରେ ଅଂଶଗ୍ରହଣ କରିବା ସହ ଏଟିଭିର ଏଭଳି ପ୍ରୟାସ ପ୍ରଶଂସନିୟ ବୋଲି ମତବ୍ୟକ୍ତ କରିଥିଲେ।
