ଅନୁଗୁଳ: ଶିମିଳିପଡା ସ୍ଥିତ ଟ୍ଵେଣ୍ଟିସେଭେନ୍ଥ ଆଲଫାବେଟ୍ କ୍ଲାସେସ୍ ତରଫରୁ ସ୍ଥାନୀୟ ଗାନ୍ଧିମାର୍ଗ ସ୍ଥିତ ସରସ୍ୱତୀ ଶିଶୁ ବିଦ୍ୟାମନ୍ଦିରର ସାରଦା ମଣ୍ଡପ ଠାରେ ଆଡମ୍ବର ସହକାରେ ଶିଶୁଦିବସ ପାଳିତ ହୋଇଯାଇଛି ।
ଏହି ଅବସରରେ ଏସ୍ଏସ୍ ଭିଏମ୍ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ଡଃ ସିଦ୍ଧନାଥ ସାହୁ ମୁଖ୍ୟ ଅତିଥି ଏବଂ ଅନୁଷ୍ଠାନର ମୁଖ୍ୟ ସୁସ୍ମିତା ଗଡନାୟକ ସମ୍ମାନିତ ଅତିଥି ଭାବରେ ଯୋଗଦେଇଥିଲେ । ମୁଖ୍ୟ ଅତିଥି ଡଃ ସାହୁ ଛାତ୍ର ଜୀବନରେ ଶୃଙ୍ଖଳିତ ଜୀବନ ଯାପନ ସହିତ ନିଜ ଲକ୍ଷ୍ୟକୁ ଆଗରେ ରଖି କାର୍ଯ୍ୟ କରିବାକୁ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇଥିଲେ । ସମ୍ମାନିତ ଅତିଥି ଶ୍ରୀମତୀ ଗଡ଼ନାୟକ ପାଠପଢ଼ା ସହିତ ବୈଷୟିକ ଜ୍ଞାନ ଆହରଣ ଉପରେ ଗୁରୁତ୍ୱାରୋପ କରିଥିଲେ ।
କାର୍ଯ୍ୟକ୍ରମରେ ଅନୁଷ୍ଠାନ ତରଫରୁ ଆୟୋଜିତ ବିଭିନ୍ନ ପ୍ରତିଯୋଗିତାର କୃତି ଛାତ୍ରଛାତ୍ରୀମାନଙ୍କୁ ଟ୍ରଫି ଓ ମାନପତ୍ର ପ୍ରଦାନ କରାଯାଇଥିଲା । ଏହି ଅବସରରେ ମୁଖ୍ୟ ଅତିଥି ଅନୁଷ୍ଠାନର ନୂତନ ଲୋଗୋ ଉନ୍ମୋଚନ କରିଥିଲେ ।
ଛାତ୍ରୀ ଜିଜ୍ଞାସା ବି. ଗଡନାୟକ ଓ ସାଇଶ୍ରୀ ମିଶ୍ର ଅତିଥି ପରିଚୟପତ୍ର ପ୍ରଦାନ କରିଥିଲେ । ଅନୁଷ୍ଠାନର ପ୍ରଶାସନିକ ଅଧିକାରୀ ବବିନ୍ ଚନ୍ଦ୍ର ଗଡନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କାର୍ଯ୍ୟକ୍ରମ ପରିଚାଳିତ ହୋଇଥିଲା । ଛାତ୍ରଛାତ୍ରୀଙ୍କ ଦ୍ୱାରା ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଅନୁଷ୍ଠାନର ସମସ୍ତ ଛାତ୍ରଛାତ୍ରୀଙ୍କ ସହ ଅଭିଭାବକମାନେ ଏଥିରେ ଯୋଗଦାନ କରିଥିଲେ । ଶେଷରେ ଶିକ୍ଷକ ସୁମିତ୍ ବାରିକ ଧନ୍ୟବାଦ ଅର୍ପଣ କରିଥିଲେ ।
