ଅନୁଗୁଳ : ଗ୍ରାମାଞ୍ଚଳର ଭିତ୍ତିଭୂମି ସୁଦୃଢ଼ କରିବା ସହ ଜନସାଧାରଣଙ୍କ ଜୀବନଶୈଳୀରେ ସକାରାତ୍ମକ ପରିବର୍ତ୍ତନ ଆଣିବା ଲକ୍ଷ୍ୟରେ ଅନୁଗୁଳ ଜିଲ୍ଲା ଛେଣ୍ଡିପଦାଠାରେ ବିଶାଳ ବିକାଶମୂଳକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଅବସରରେ ପ୍ରାୟ ୧୭୨ କୋଟି ଟଙ୍କା ମୂଲ୍ୟର ୪୧ଟି ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିଛନ୍ତି। ଏଥିମଧ୍ୟରେ ୧୬୨.୯୧ କୋଟି ଟଙ୍କାର ୩୫ଟି ପ୍ରକଳ୍ପର ଭୂମିପୂଜନ ଏବଂ ୮.୭୩ କୋଟି ଟଙ୍କାର ୬ଟି ପ୍ରକଳ୍ପର ଉଦଘାଟନ ସାମିଲ ଅଛି। ଶ୍ରୀ ପ୍ରଧାନ କହିଛନ୍ତି ଯେ, ‘ବିକଶିତ ଭାରତ’ ପାଇଁ ଅନୁଗୁଳ ଓ ଛେଣ୍ଡିପଦାର ସର୍ବାଙ୍ଗିନ ଉନ୍ନତି ଏକାନ୍ତ ଆବଶ୍ୟକ।

ଏହି ଗସ୍ତ କାଳରେ ମନ୍ତ୍ରୀ ଅଞ୍ଚଳର ପ୍ରଗତି ପାଇଁ ନୂତନ ଷ୍ଟାଡିୟମ୍ ଓ କମ୍ୟୁନିଟି ସେଣ୍ଟରର ଶୁଭାରମ୍ଭ କରିବା ସହ ୪୨ ଜଣ ହିତାଧିକାରୀଙ୍କୁ ସରକାରୀ ଯୋଜନାର ସୁଫଳ ବଣ୍ଟନ କରିଥିଲେ। ସେ ସୂଚନା ଦେଇଛନ୍ତି ଯେ, ଆଗାମୀ ଦିନରେ ଜିଲ୍ଲାକୁ ୨୫,୦୦୦ରୁ ଅଧିକ ପ୍ରଧାନମନ୍ତ୍ରୀ ଆବାସ ଗୃହ ଯୋଗାଇ ଦିଆଯିବ। ପର୍ଯ୍ୟଟନ କ୍ଷେତ୍ରରେ ଡେରଜଙ୍ଗ ପ୍ରକଳ୍ପରେ ନୂତନ ବୋଟିଂ ସୁବିଧା ସ୍ଥାନୀୟ ଲୋକଙ୍କ ପାଇଁ ରୋଜଗାରର ନୂଆ ପନ୍ଥା ଫିଟାଇବ। ଏଥିସହ ସ୍କୁଲଗୁଡ଼ିକୁ ପ୍ଲାଷ୍ଟିକମୁକ୍ତ କରିବା ଓ ପରିବେଶ ସୁରକ୍ଷା ଉପରେ ସେ ଗୁରୁତ୍ୱାରୋପ କରିଛନ୍ତି।

ଶେଷରେ, ଛେଣ୍ଡିପଦାଠାରେ ଏକ ନୂତନ ଦଳୀୟ କାର୍ଯ୍ୟାଳୟ ଉଦଘାଟନ କରିବା ସହ ଶ୍ରୀ ପ୍ରଧାନ କାର୍ଯ୍ୟକର୍ତ୍ତାମାନଙ୍କୁ ‘ଅନ୍ତ୍ୟୋଦୟ’ ମନ୍ତ୍ରରେ ଦୀକ୍ଷିତ ହୋଇ ସମାଜର ଶେଷ ଧାଡ଼ିରେ ଥିବା ବ୍ୟକ୍ତିଙ୍କ ପାଖରେ ସେବା ପହଞ୍ଚାଇବାକୁ ଆହ୍ୱାନ ଦେଇଛନ୍ତି। ଏହି ଅବସରରେ ବଅଁରପାଳର ତୁରଙ୍ଗଠାରେ ପଞ୍ଚାୟତ ଗୃହ ଓ ଯାତ୍ରୀ ବିଶ୍ରାମାଗାର ମଧ୍ୟ ଉଦଘାଟିତ ହୋଇଯାଇଛି।