ବିପ୍ଳବୀ ଜନନାୟକ ନବକୃଷ୍ଣଙ୍କ ୧୨୪ ତମ ଜୟନ୍ତୀ

You are currently viewing ବିପ୍ଳବୀ ଜନନାୟକ ନବକୃଷ୍ଣଙ୍କ ୧୨୪ ତମ ଜୟନ୍ତୀ

ଅନୁଗୁଳ: ଜିଲ୍ଲା ସଂସ୍କୃତି ପାଠାଗାର ପରିସରରେ ବିପ୍ଳବୀ ଜନନାୟକ ନବକୃଷ୍ଣ ଚୌଧୁରୀଙ୍କ ୧୨୪ ତମ ଜୟନ୍ତୀ ପାଳିତ ହୋଇଯାଇଛି।ଅନୁଗୁଳ ସାହିତ୍ୟ ସଂସଦ, ନବ ମାଳତୀ ଟ୍ରଷ୍ଟ ଓ ଓଡ଼ିଶା ସାହିତ୍ୟ ସଂସଦ ଆନୁକୂଲ୍ୟରେ ଏହି ଜୟନ୍ତୀ ଆୟୋଜିତ ହୋଇଥିଲା। ବିଶିଷ୍ଟ ଶିଶୁ ସାହିତ୍ୟିକ ଡ଼ା ରାମଚନ୍ଦ୍ର ନାୟକ ମୁଖ୍ୟ ଅତିଥି ରୂପେ ଏହି ସମାରୋହକୁ ଉଦ୍ଘାଟନ କରିଥିଲେ। ମୁଖ୍ୟ ଅତିଥି ଶ୍ରୀ ନାୟକ ନିଜ ଅଭିଭାଷଣରେ ନବକୃଷ୍ଣଙ୍କୁ ଜଣେ ଦରଦୀ ମଣିଷ ଓ ମଣିଷ ପଣିଆର ଉପାସକ ରୂପେ ଚିତ୍ରଣ କରିଥିଲେ । ମୌଳିକ ଶିକ୍ଷାର ବିକାଶ,କୃଷି ଓ କୃଷକର ଉନ୍ନତି,ଭାଷା ସାହିତ୍ୟ ର ବିକାଶ ପାଇଁ ତାଙ୍କ ନିରଳସ ଉଦ୍ୟମ ଓଡ଼ିଶା ଇତିହାସରେ ଏକ ସ୍ୱର୍ଣିମ ଅଧ୍ୟାୟ ହୋଇ ରହିବ ବୋଲି ଶ୍ରୀ ନାୟକ ପ୍ରକାଶ କରିଥିଲେ।

ସମାରୋହରେ ମୁଖ୍ୟବକ୍ତା ଭାବେ ଯୋଗ ଦେଇ ଡ଼ା ସଞ୍ଜୟ କୁମାର  ପଣ୍ଡା ନବବାବୁଙ୍କ ତ୍ୟାଗପୂତ ଜୀବନ ଚର୍ଯ୍ୟା ଜନ ସାଧାରଣଙ୍କ ପାଇଁ ଅନୁଶୀଳନ ଯୋଗ୍ୟ ବୋଲି କହିଥିଲେ। ସମାଜ ସୁଧାର କ୍ଷେତ୍ରରେ ତାଙ୍କର ବିଶେଷ ଅବଦାନ ଏ ଜାତି ସବୁଦିନେ ମନେରଖିବ। ସଭାରେ ପୌରହିତ୍ୟ କରି ଅନୁଗୁଳ ସାହିତ୍ୟ ସଂସଦ ସଭାପତି ପ୍ରାଧ୍ୟାପକ କୁମୁଦ ଚନ୍ଦ୍ର ଦାସ ନବକୃଷ୍ଣ ଚୌଧୁରୀଙ୍କୁ ମାର୍କସବାଦି ଆନ୍ଦୋଳନର ପ୍ରବକ୍ତା ରୂପେ ଚିତ୍ରଣ କରିବା ସହ ସେ ଆତ୍ମ ପ୍ରଚାର ପ୍ରତି ବିମୁଖ ଥିଲେ ବୋଲି କହିଥିଲେ। ସମାରୋହରେ ସମାଜସେବୀ ଶୋଭାକର ସ୍ୱାଇଁଙ୍କୁ ମୁଖ୍ୟ ଅତିଥି ଜନସେବା ସମ୍ମାନ – ୨୦୨୫ ପ୍ରଦାନ କରିଥିଲେ।

ରମେଶ ଚନ୍ଦ୍ର ମିଶ୍ର ଅତିଥି ପରିଚୟ ପ୍ରଦାନ କରିଥିଲେ। କବି ସ୍ବର୍ଗତ ରାଜେନ୍ଦ୍ର କିଶୋର ପଣ୍ଡାଙ୍କ ବିୟୋଗରେ ଏକ ଶୋକ ବାର୍ତ୍ତା ପାଠ କରିଥିଲେ ସଂସଦର ସମ୍ପାଦକ ରାଧାକାନ୍ତ ମହାନ୍ତି। ଗାଳ୍ପିକା ବସନ୍ତ ମଞ୍ଜରୀ ମିଶ୍ରଙ୍କ ପୁସ୍ତକ ଆକାଶ କଇଁଆକୁ ଅତିଥି ମାନେ ଉନ୍ମୋଚନ କରିଥିଲେ।ସମାରୋହରେ ବିତର୍କ ପ୍ରତିଯୋଗିତାର ପ୍ରତିଯୋଗୀ ମାନଙ୍କୁ ନଗଦ ପ୍ରୋତ୍ସାହନ ରାଶି ଓ ମାନପତ୍ର ଦିଆଯାଇଥିଲା। ପ୍ରିନ୍ସ ରାଉତ ପ୍ରଥମ,ଦୀପଶିଖା ମାଝୀ ଦ୍ଵିତୀୟ ଓ ଶିବାନୀ ବେହେରା ତୃତୀୟ ସ୍ଥାନ ହାସଲ କରିଥିଲେ। ସଂସଦର ଉପସଭାପତି ଇନ୍ଦିରା ଦାସ ମଞ୍ଚ ପରିଚାଳନା କରିଥିବା ବେଳେ ନବ ମାଳତୀ ଟ୍ରଷ୍ଟର ସମ୍ପାଦକ ଶିବରାମ ମିଶ୍ର ଧନ୍ୟବାଦ୍ ଅର୍ପଣ କରିଥିଲେ।

Share

Leave a Reply