ଅନୁଗୁଳ: ବିବାହ ପ୍ରତିଶ୍ରୁତି ଦେଇ ଜଣେ ନାବାଳିକାଙ୍କ ସହ ଦୁଷ୍କର୍ମ କରିବା ଅଭିଯୋଗରେ ଅନୁଗୁଳ ଟାଉନ ଥାନା ପୋଲିସ ଜଣେ ଯୁବକକୁ ଗିରଫ କରିଛି। ଗିରଫ ଅଭିଯୁକ୍ତ ହେଲା ହେମସୁରପଡ଼ାର ବିଜୟ କୁମାର ନାଏକ(୨୭)।
ଅଭିଯୋଗ ଅନୁସାରେ, ବିଜୟ ସହରର ଜଣେ ଛାତ୍ରୀଙ୍କୁ ପ୍ରେମ ଜାଲରେ ଫସାଇ ଜନ୍ମଦିନ ପାଳିବାକୁ ଏକ ହୋଟେଲକୁ ଡାକିଥିଲେ। ସେଠାରେ ତାଙ୍କୁ ଏକୁଟିଆ ପାଇ ଦୁଷ୍କର୍ମ କରିଥିଲେ। ପରେ ବିବାହ ପ୍ରତିଶ୍ରୁତି ଦେଇ ବାରମ୍ବାର ଦୁଷ୍କର୍ମ କରିଥିଲେ। ଏଥିସହ କାହାକୁ ଏ ନେଇ ଜଣାଇଲେ ଜୀବନରୁ ମାରିଦେବାକୁ ଧମକ ବି ଦେଉଥିଲେ। ଫଳରେ ନାବାଳିକା ଜଣଙ୍କ ଗର୍ଭବତୀ ହୋଇଥିଲେ। ଏହା ଜଣାପଡ଼ିବା ପରେ ସେ ବିବାହ ପାଇଁ ଚାପ ପକାଇଥିଲେ। ହେଲେ ବିଜୟ ବିବାହ କରିବାକୁ ମନା କରିଦେବା ସହ ତାଙ୍କର ଗର୍ଭପାତ କରାଇଥିଲେ।
ଏହା ପରେ ବିଜୟ ଆଉ ଧରାଛୁଆଁ ନ ଦେବା ସହ ଅନ୍ୟଜଣଙ୍କୁ ବିବାହ କରିଥିଲେ। ଏଥିନେଇ ପୀଡ଼ିତା ଅଭିଯୋଗ କରିବା ପରେ ଅନୁଗୁଳ ଟାଉନ ଥାନା ପୋଲିସ ତାକୁ ଗିରଫ କରି କୋର୍ଟ ଚାଲାଣ କରିଛି।
