ଅନୁଗୁଳ: ଅନୁଗୁଳ ଜିଲ୍ଲା ଅବକାରୀ ବିଭାଗ ଆଜି ଛେଣ୍ଡିପଦା ଥାନା ମାଛକୁଟା ଗାଁରେ ଚଢ଼ାଉ କରି ଏକ ନକଲି ମଦ କାରଖାନା ଠାବ କରିଛି। ଏହି ଘଟଣାରେ ଦୁଇ ଜଣଙ୍କୁ ଗିରଫ କରାଯାଇଛି ଓ ସେମାନଙ୍କ ନିକଟରୁ ବିପୁଳ ପରିମାଣର ନକଲି ବିଦେଶୀ ମଦ, ଠିପି, ଦେଶୀ ମଦ ଓ ସିଲ ମେସିନ ଜବତ କରାଯାଇଛି।
ସୂଚନା ଅନୁସାରେ, ଏକ କାରରେ ନକଲି ମଦ ଚାଲାଣ ହେଉଥିବା ଖବର ପାଇ ଅନୁଗୁଳ ଅବକାରୀ ବିଭାଗ ମାଛକୁଟା ଚାରବାଟିଆ ନିକଟରେ ଏକ କାରକୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ ସେଥିରେ ୩ ଜାରକିନ ଦେଶୀ ମଦ, ଦୁଇଟି ପେଟିରେ ନକଲି ବିଦେଶୀ ମଦ ଓ ଠିପି ଜବତ ହୋଇଥିଲା। ଘଟଣାରେ ବ୍ଯବହୃତ କାରକୁ ମଧ୍ଯ ଜବତ କରା ଯାଇଥିବା ବେଳେ ମାଛକୁଟା ଗାଁର ଚିକୁ ବେହେରା ଓ ଢେଙ୍କାନାଳ ଗୋଡିଡିହ ଗାଁର ବିପିନ ସାହୁକୁ ଗିରଫ କରି କୋର୍ଟ ଚାଲାଣ କରାଯାଇଛି। ତେବେ ଅଧିକ ତଦନ୍ତ ଚାଲିଥିବା ବେଳେ ରାଜ୍ୟ ବାହାରୁ ବୋତଲ ଓ ଠିପି ମଗାଇ ଦେଶୀ ମଦରେ ରଙ୍ଗ ମିଶାଇ ଏମାନେ ବାହାର ବଜାରରେ ବିକ୍ରି କରୁଥିବା ଜଣାପଡ଼ିଛି।
