ଦେଶ ପାଇଁ ଖେଳିବେ ତାଳଚେରର ପୁଅ ସନ୍ତୋଷ: ଭାରତୀୟ ଦିବ୍ୟାଙ୍ଗ (ବଧୀର)କ୍ରିକେଟ୍ ଟିମରେ ପାଇଲେ ସ୍ଥାନ

ଅନୁଗୁଳ: ଦେଶର ପ୍ରତିନିଧିତ୍ୱ କରିବେ ତାଳଚେର ମାଟିର ପୁଅ। ଭାରତ ପାଇଁ ଖେଳିବେ ତାଳଚେର ହାଟତୋଟା ୧୫ ନମ୍ବର ୱାର୍ଡର ବସନ୍ତ କୁମାର ମହାପାତ୍ର ଓ ସଂଧ୍ୟାରାଣୀ ମହାପାତ୍ରଙ୍କ ବଡ଼ ପୁଅ ସନ୍ତୋଷ କୁମାର ମହାପାତ୍ର। ସନ୍ତୋଷ ଭାରତୀୟ ଦିବ୍ୟାଙ୍ଗ (ବଧୀର)କ୍ରିକେଟ୍ ଟିମ୍ ରେ ସ୍ଥାନ ପାଇଛନ୍ତି। ସନ୍ତୋଷ ଶୁଣି ପାରନ୍ତି ନାହିଁ କି କହି ବି ପାରନ୍ତିନି। କିନ୍ତୁ ଓଡ଼ିଶା ପାଇଁ ଆଣି ଦେଇଛନ୍ତି ଅପୂର୍ବ ସଫଳତା।

ଆସନ୍ତା ଡିସେମ୍ବର ୨ରୁ ଶ୍ରୀଲଙ୍କା ସହିତ ଭାରତୀୟ ବଧୀର କ୍ରିକେଟ ଟିମ୍ ମଧ୍ୟରେ ୫ଟି ମ୍ୟାଚ ଖେଳାଯିବ। ଏଥିପାଇଁ ୧୫ ଜଣିଆ ଦଳ ଘୋଷଣା ହୋଇଥିବା ବେଳେ ଏଥିରେ ସ୍ଥାନ ପାଇଛନ୍ତି ସନ୍ତୋଷ। ସେ ତାଳଚେରର ୟୁଥ୍ ସ୍ପିର୍ଟିଂ କ୍ରିକେଟ୍ କ୍ଲବର ଜଣେ ସକ୍ରିୟ ସଦସ୍ୟ। ଦିଲ୍ଲୀରେ ହେବାକୁ ଥିବା ଶ୍ରୀଲଙ୍କା ବିପକ୍ଷରେ ଦିନିକିଆ ସିରିଜ ପାଇଁ ସନ୍ତୋଷ କୁମାର ମହାପାତ୍ରଙ୍କୁ ଭାରତୀୟ ଦଳରେ ସାମିଲ କରାଯାଇଛି।

ଏହି ଖବର ଶୁଣି ସମଗ୍ର ତାଳଚେରରେ ଖୁସିର ଲହରୀ ଖେଳି ଯାଇଛି। ତାଳଚେର ବିଧାୟକଙ୍କ ସହ ଅନେକ ଶୁଭେଚ୍ଛୁ ତାଙ୍କୁ ଅଭିନନ୍ଦନ ଜଣାଉଥିବା ଦେଖିବାକୁ ମିଳିଛି।