ଅନୁଗୁଳ: କଣିହାଁ ବ୍ଳକ୍ ଡେରେଙ୍ଗ ସ୍ଥିତ ଜେଆଇଟିପିଏଲ କାରଖାନାକୁ କୋଇଲା ପରିବହନରେ ସ୍ଥାନୀୟ ଟ୍ରକ୍ ମାଲିକମାନଙ୍କୁ ଉପେକ୍ଷା କରାଯାଉଛି । ଜମିବାଡ଼ି ହରାଇ ଗାଡ଼ି କରି ଗୁଜୁରାଣ ମେଣ୍ଟାଉଥିବା ଗାଡ଼ିମାଲିକଙ୍କୁ ଅଣଦେଖା କରି ବାହାର ଇଲାକାର ଗାଡ଼ିକୁ ପ୍ରାଧାନ୍ୟ ଦିଆଯାଉଥିବା ଅଭିଯୋଗ କରି ମଙ୍ଗଳବାର କଣିହାଁ କୋଇଲା ଖଣି ସମ୍ମୁଖରେ ରିଜିଓନାଲ ଟ୍ରକ ମାଲିକ ସଂଘ ତରଫରୁ ଧାରଣା ଦିଆଯାଇଥିଲା । ଫଳରେ ଜେଆଇଟିପିଏଲକୁ କୋଇଲା ପରିବହନ ବାଧାପ୍ରାପ୍ତ ହୋଇଥିଲା । କଣିହାଁ ଅତିରିକ୍ତ ତହସିଲଦାର ରବୀନ୍ଦ୍ର ସାମଲ, କଣିହାଁ ଆଇଆଇସି ରାଜେନ୍ଦ୍ର ନାରାୟଣ ପଟ୍ଟନାୟକ ଘଟଣାସ୍ଥଳରେ ପହଞ୍ଚି ଧାରଣାରେ ବସିଥିବା ଟ୍ରକ ମାଲିକ ସଂଘ ସଦସ୍ୟଙ୍କ ସହ ଆଲୋଚନା କରିଥିଲେ । ଅପରାହ୍ନରେ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଏ ନେଇ ବୈଠକ ବସି ଆଲୋଚନା ହେବା ପରେ ସଂଘ ଧରଣାରୁ ଓହରିଥିଲା । ଆସନ୍ତା ସପ୍ତାହରେ ଏ ପ୍ରସଙ୍ଗରେ ଆଲୋଚନା ହୋଇ ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ଉପଜିଲ୍ଲାପାଳ ରଜନୀକାନ୍ତ ସ୍ୱାଇଁ ପ୍ରକାଶ କରିଥିଲେ । ସଂଘ ସଭାପତି ସତ୍ୟସ୍ବରୂପ ପ୍ରଧାନ, ସମ୍ପାଦିକ ଆଲୋକ ସାହୁ, କଣିହାଁ ବ୍ଲକ ଅଧ୍ୟକ୍ଷା ନମିତା ସାହୁ, ଉପାଧ୍ୟକ୍ଷ ତ୍ରିପୁରାରୀ ପ୍ରଧାନ, କଣିହାଁ ସମିତିସଭ୍ୟ ଦେବେନ୍ଦ୍ର ବାରିକ, ପ୍ରାକ୍ତନ ଜିଲ୍ଲା ପରିଷଦ ସଭ୍ୟ ଦେବଦତ୍ତ ପ୍ରଧାନ ପ୍ରମୁଖ ଧାରଣାରେ ବସିଥିଲେ।
