ଅନୁଗୁଳ: ଅନୁଗୁଳର ଓ.ପି. ଜିନ୍ଦଲ ସ୍କୁଲ ପକ୍ଷରୁ ଜିନ୍ଦଲ ନଗରସ୍ଥିତ ଇଡେନ୍ ଗାର୍ଡେନ୍ ପରିସରରେ ବାର୍ଷିକ ପ୍ରଦର୍ଶନୀ ‘ଏକ୍ସପ୍ଲୋରାଇଜ୍ ୨୦୨୫-୨୬’ ଅନୁଷ୍ଠିତ ହୋଇଯାଇଛି। ଏହି ପ୍ରଦର୍ଶନୀରେ ଛାତ୍ରଛାତ୍ରୀମାନଙ୍କ ଦ୍ୱାରା ପ୍ରସ୍ତୁତ ପ୍ରାୟ ୨୦୦ଟି ଅଭିନବ ଏବଂ ସୃଜନଶୀଳ ପ୍ରକଳ୍ପ ପ୍ରଦର୍ଶିତ ହୋଇଥିଲା। ବିଜ୍ଞାନ, ଗଣିତ, ସାହିତ୍ୟ, ସାମାଜିକ ବିଜ୍ଞାନ, କଳା, କ୍ରୀଡ଼ା, ବ୍ରିଟିଶ୍ କାଉନସିଲ୍, ୟୁନେସ୍କୋ, ବାଣିଜ୍ୟ ଏବଂ କ୍ୟାରିୟର ପରାମର୍ଶ ସମେତ ବିଭିନ୍ନ କ୍ଷେତ୍ରରେ ଛାତ୍ରଛାତ୍ରୀଙ୍କ ସୃଜନଶୀଳତା ଏବଂ ଉତ୍କର୍ଷତା ପ୍ରଦର୍ଶିତ ହୋଇଥିଲା। ଶିକ୍ଷକମାନଙ୍କ ତତ୍ତ୍ୱାବଧାନ ଏବଂ ମାର୍ଗଦର୍ଶନରେ ପ୍ରସ୍ତୁତ ଏହି ପ୍ରକଳ୍ପଗୁଡ଼ିକ ଦର୍ଶକଙ୍କ ମନକୁ ଆକର୍ଷିତ କରିଥିଲା।
ସ୍କୁଲ୍ ଅଧ୍ୟକ୍ଷ ଡଃ ଅଶ୍ୱିନୀ କୁମାର ସାହୁ ସ୍ୱାଗତ ଅଭିଭାଷଣ ଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଛାତ୍ରଛାତ୍ରୀମାନେ ସ୍ୱାଗତ ସଙ୍ଗୀତ, ନୃତ୍ୟ ଏବଂ ସ୍କୁଲ୍ ବ୍ୟାଣ୍ଡ୍ ଦ୍ୱାରା ବାଦ୍ୟ ପରିବେଷଣ ମାଧ୍ୟମରେ ପ୍ରଦର୍ଶନୀକୁ ସଜୀବ କରିଥିଲେ।
ମୁଖ୍ୟ ଅତିଥି ଭାବେ ଯୋଗ ଦେଇଥିବା କର୍ଣ୍ଣେଲ ସୁଦୀପ ମାଜୀ, ଉପ-ସଭାପତି ଓ ପ୍ରଶାସନ ମୁଖ୍ୟ, ଜିନ୍ଦଲ ଷ୍ଟିଲ୍, ଅନୁଗୁଳ ପ୍ରଦର୍ଶନୀକୁ ଉଦଘାଟନ କରି ଛାତ୍ରଛାତ୍ରୀଙ୍କ ସୃଜନଶୀଳତାକୁ ପ୍ରଶଂସା କରିଥିଲେ। ଏହି ଅବସରରେ ପ୍ରଦର୍ଶନୀ ବିଜେତା ଏବଂ ଓପିଜେଏସଏର ଯୁବ ଲେଖକ-ଲେଖିକାମାନଙ୍କୁ ସମ୍ମାନିତ କରାଯାଇଥିଲା।


