ଅନୁଗୁଳ: ଅନୁଗୁଳ ଜିଲ୍ଲା ନାଲକୋ ଥାନା ଅନ୍ତର୍ଗତ ନାଲକୋ ନଗରରେ ଜଣେ ନାଲକୋ କର୍ମଚାରୀ ତାଙ୍କ ସ୍ତ୍ରୀ ଓ ଶଳାଙ୍କୁ ମାଡ଼ ମାରିବା ଅଭିଯୋଗରେ ଗିରଫ ହୋଇଛନ୍ତି। ସୂଚନା ମୁତାବକ, ନାଲକୋର କର୍ମଚାରୀ ଆଶୁତୋଷ ରଥ ଗତ ୨ ତାରିଖରେ ତାଙ୍କ ସ୍ତ୍ରୀଙ୍କୁ ମାଡ଼ ମରିଥିଲେ। ଏ ନେଇ ତାଙ୍କ ସ୍ତ୍ରୀ ତାଙ୍କ ଭାଇ କଲିଏରୀ ଥାନା ଅନ୍ତର୍ଗତ ଜଗନ୍ନାଥପୁରର ପ୍ରଦିପ୍ତ କୁମାର ଧରଙ୍କୁ ଫୋନକରି ଜଣାଇଥଲେ। ଖବର ପାଇ ପ୍ରଦିପ୍ତ ନାଲକୋନଗରରେ ରହୁଥିବା ତାଙ୍କ ଭିଣୋଇଙ୍କ କ୍ବାଟର ନଂ ବି-୨୬୬ରେ ପହଞ୍ଚିଲେ। ସେଠାରେ ଭଉଣୀଙ୍କୁ ମାଡ଼ ନେଇ କଥା ହେବା ବେଳେ ଆଶୁତୋଷ ଉତ୍କ୍ଷିପ୍ତ ହୋଇ ପ୍ରଦିପ୍ତଙ୍କୁ ନିସ୍ତୁକ ମାଡ଼ମାରି ତଳେ ପକାଇ ଛାତି ଉପରେ କୁଦି ପକାଇଥିଲେ। ଏ ନେଇ ପ୍ରଦିପ୍ତ ଗୁରୁବାର ନାଲକୋ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇ ପୁଲିସ ଏକ ମାମଲା ରୁଜୁକରି ଶୁକ୍ରବାର ଆଶୁତୋଷଙ୍କୁ ଗିରଫ କରି କୋର୍ଟ ଚାଲାଣ କରିଛି।
