ପାଳଲହଡ଼ା: ପାଳଲହଡା ଉପଖଣ୍ଡ ୪୯ ନଂ ଜାତୀୟ ରାଜପଥ ମୁକ୍ତାପୁର ନିକଟସ୍ଥ ରାଜୁ ଢାବା ସମ୍ମୁଖରେ ଟ୍ରଲର ଧକ୍କାରେ ଜଣେ ଯୁବକ ଗୁରୁତର ହୋଇଛନ୍ତି।
ସୂଚନା ଅନୁଯାୟୀ, ପାଳଲହଡା ଶିଗଡ଼ ପଞ୍ଚାୟତ ତିମି ଗାଁର ପୂର୍ଣ୍ଣଚନ୍ଦ୍ର ପ୍ରଧାନ (୪୮) ଜାତୀୟ ରାଜପଥ ଅତିକ୍ରମ କରିଥିବା ସମୟରେ ରାୟଗଡ଼ରୁ କଲିକତା ଯାଉଥିବା ଏକ ଟ୍ରଲର (NL01 AD 2882) ତାଙ୍କୁ ଧକ୍କା ଦେଇଥିଲା। ଟ୍ରଲର ପୂର୍ଣ୍ଣଚନ୍ଦ୍ରଙ୍କର ବାମ ଗୋଡ଼ ଉପରେ ଚଢ଼ି ଯାଇଛି। ଏହି ସମୟରେ ସେହି ରାସ୍ତା ଦେଇ ପାଳଲହଡା ଥାନାଧିକାରୀ ପାରାଓ ଟୁଡୁ ଯାଉଥିବା ବେଳେ ପୂର୍ଣ୍ଣଚନ୍ଦ୍ରକୁ ନିଜ ଗାଡ଼ିରେ ଆଣି ସ୍ଥାନୀୟ ଚିକିତ୍ସାଳୟରେ ଭର୍ତ୍ତି କରାଇଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି।
ପାଳଲହଡା ଥାନାଧିକାରୀ ଦୁର୍ଘଟଣାଗ୍ରସ୍ତ ଟ୍ରଲରକୁ ଜବତ କରିବା ସହିତ ଡ୍ରାଇଭର ବିହାରର ଅଜୟ ଯାଦବକୁ ଅଟକ ରଖିଛନ୍ତି।
