ଛେଣ୍ଡିପଦା: ଅନୁଗୁଳ ଜିଲ୍ଲା ଛେଣ୍ଡିପଦା ଥାନା କରଡାବାହାଳ ଗ୍ରାମରେ ମଙ୍ଗଳବାର ବିଦ୍ୟୁତ୍ ସର୍ଟସର୍କିଟ୍ରୁ ଅଗ୍ନିକାଣ୍ଡ ଘଟି ଗୋଟିଏ ବଖରା ଘର ପୋଡ଼ିଯାଇଛି। ଏଥିରେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ଜଣାଯାଇଛି।
ସୂଚନା ଯେ, ଅପରାହ୍ଣ ପ୍ରାୟ ସାଢ଼େ ୩ ଟାରେ ଗ୍ରାମର ପ୍ରଫୁଲ୍ଲ କୁମାର ସାହୁଙ୍କ ରହିବା ଘରେ ବିଦ୍ୟୁତ ସର୍ଟସର୍କିଟ୍ରୁ ନିଆଁ ଲାଗିଥିଲା। ସେହି ସମୟରେ ପ୍ରଫୁଲ୍ଲ ଓ ତାଙ୍କ ପତ୍ନୀ ଘର ବାହାରେ ଥିଲେ। ହଠାତ୍ ଘର ଭିତରୁ ଧୂଆଁ ବାହାରିବା ପରେ ଅଗ୍ନିକାଣ୍ଡ ହେବାର ଜାଣିବାକୁ ପାଇଥିଲେ। ଘର ଭିତରେ ତାଙ୍କ ଦେଢ଼ ବର୍ଷର ଶିଶୁପୁତ୍ର ଶୋଇଥିଲା। ସେ ତାକୁ ସଙ୍ଗେ ସଙ୍ଗେ ବାହାରକୁ ନେଇ ଆସିଥିଲେ । ତେବେ ଅଗ୍ନିକାଣ୍ଡରେ ଘରେ ଥିବା ଲୁଗାପଟା,ପଲଙ୍କ, ଟିଭି, ଫ୍ରିଜ, କୁଲର, ବାସନ, ଚାଉଳ ଆଦି ସମସ୍ତ ସାମଗ୍ରୀ ପୋଡିଯାଇଥିଲା। ଗ୍ରାମବାସୀଙ୍କ ସହଯଗରେ ନିଆଁକୁ ଆୟତ୍ତ କରାଯାଇଥିଲା ।
