ଭୁବନେଶ୍ୱର: ଟ୍ରେନ୍ ଟ୍ରାକ୍ ନିକଟରେ, ଟ୍ରେନରେ ଛାତ ଉପରେ କିମ୍ବା ଫୁଟବୋର୍ଡରେ ଭିଡିଓ ସୁଟିଂ କରି ‘ରିଲ୍ସ’ (Reels) ତିଆରି କରିବା ଭଳି ବିପଦଜ୍ଜନକ କାର୍ଯ୍ୟକୁ ପୂର୍ବତଟ ରେଳପଥ କଡ଼ାକଡ଼ି ବିରୋଧ କରି ଏକ ସଚେତନତା ଅଭିଯାନ ଆରମ୍ଭ କରିଛି।
ରେଳପଥ ସ୍ପଷ୍ଟ କରିଛି ଯେ ଏହିପରି ବେପରୁଆ କାମ କେବଳ ମାରାତ୍ମକ ନୁହେଁ, ବରଂ ରେଳବାଇ ଆଇନ, ୧୯୮୯ ଅନୁଯାୟୀ ଏହା ଏକ ଦଣ୍ଡନୀୟ ଅପରାଧ। ସାମାଜିକ ଗଣମାଧ୍ୟମରେ ଲୋକପ୍ରିୟ ହେବା ପାଇଁ ଅନେକ ଯୁବକ ନିଜ ଜୀବନକୁ ବିପଦରେ ପକାଉଥିବାରୁ ଏହି ପଦକ୍ଷେପ ନିଆଯାଇଛି।
ରେଳ ସୁରକ୍ଷା ବଳ (RPF) ଏବଂ ସରକାରୀ ରେଳ ପୋଲିସ (GRP)କୁ ଏହି ନିୟମ ଭାଙ୍ଗୁଥିବା ବ୍ୟକ୍ତିଙ୍କ ବିରୁଦ୍ଧରେ ‘ଶୂନ୍ୟ ସହନଶୀଳତା’ ନୀତି ଆପଣାଇବାକୁ ନିର୍ଦ୍ଦେଶ ଦିଆଯାଇଛି। ରେଳ ଟ୍ରାକ୍ ଉପରେ ଅନଧିକୃତ ପ୍ରବେଶ କରୁଥିବା କିମ୍ବା ବିପଦପୂର୍ଣ୍ଣ ଷ୍ଟଣ୍ଟ କରୁଥିବା ବ୍ୟକ୍ତିଙ୍କ ବିରୁଦ୍ଧରେ ରେଳ ଆଇନର ଧାରା ୧୪୭ ଓ ୧୫୩ ଅନୁଯାୟୀ ମାମଲା ରୁଜୁ ହେବ ଏବଂ ଜେଲ୍ ସହିତ ଜରିମାନା ମଧ୍ୟ ହୋଇପାରେ।
ରେଳପଥ ସମସ୍ତ ନାଗରିକଙ୍କୁ, ବିଶେଷ କରି ଛାତ୍ର ଏବଂ ଯୁବକମାନଙ୍କୁ ସୁରକ୍ଷା ନିୟମ ମାନିବାକୁ ଅନୁରୋଧ କରିଛି। ଏଥିସହ ଅଭିଭାବକ ଓ ଶିକ୍ଷକମାନଙ୍କୁ ପିଲାମାନଙ୍କୁ ଏହି ବାସ୍ତବ ବିପଦ ଏବଂ ଆଇନଗତ ପରିଣାମ ବିଷୟରେ ବୁଝାଇବାକୁ କୁହାଯାଇଛି।
