ଅନୁଗୁଳ : ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ଅନ୍ତର୍ଗତ ଭାଲିଆସର ଗାଁରେ ଥିବା ଜୟନ୍ତ ଅଗ୍ରୱାଲଙ୍କ ଫାର୍ମ ହାଉସରେ ମଙ୍ଗଳବାର ବଳଦ ପଶିବାକୁ ନେଇ ମାଡ଼ପିଟ ହୋଇଛି। ଏଥିରେ ୨ ଜଣ ଆହତ ହୋଇଛନ୍ତି। ସୂଚନା ଅନୁସାରେ, ଫାର୍ମ ହାଉସରେ ସେହି ଗାଁର ସୁଦର୍ଶନ ମୁଣ୍ଡା ତାଙ୍କର ବଳଦ ଭର୍ତ୍ତି କରିଥିଲେ। ଏ ନେଇ ଫାର୍ମ ହାଉସ ଜଗୁଆଳି ଦୁଖିଆ ମୁଣ୍ଡା କାହିଁକି ବଳଦ ଭର୍ତ୍ତି କରିଲ ବୋଲି ବାରଣ କରିବାରୁ ସୁଦର୍ଶନ ଓ ତାଙ୍କର ୩ ପୁଅ ପିତବାସ, ଦିପନ ଓ ଅରକ୍ଷିତ ଠେଙ୍ଗାବାଡ଼ି ଧରି ଦୁଖିଆଙ୍କୁ ବାଡ଼େଇଥିଲେ। ଏହା ଦେଖି ଦୁଖିଆଙ୍କ ଭଉଣୀ ସୁଶିଳା ଏମାନଙ୍କୁ ଛଡ଼ାଇବାକୁ ଆସି ମାଡ଼ ଖାଇଥିଲେ। ଫଳରେ ମାଡ଼ଖାଇ ଦୁଖିଆ ଓ ସୁଶିଳା ଆହତ ହୋଇ ଛେଣ୍ଡିପଦା ଡାକ୍ତରଖାନାରେ ଭର୍ତ୍ତି ହୋଇଥିଲେ। ତେବେ ସୁଶିଳାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଅନୁଗୁଳ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏ ନେଇ ଅଭିଯୋଗ ପାଇବାପରେ ପୁଲିସ ଏକ ମାମଲା ରୁଜୁକରି ସୁଦର୍ଶନ, ପିତବାସ, ଦିପନ ଓ ଅରକ୍ଷିତଙ୍କୁ ଗିରଫକରି କୋର୍ଟ ଚାଲାଣ କରିଛି।
