ଅନୁଗୁଳ: ଆଜି ତାଳଚେର ପୌରପରିଷଦର ବିଭିନ୍ନ ଦୋକାନରେ ଖାଦ୍ୟ ନିରାପତ୍ତା ପକ୍ଷରୁ ଚଢ଼ଉ କରାଯାଇ ଅପମିଶ୍ରିତ ଖାଦ୍ୟକୁ ନଷ୍ଟ କରାଯାଇଛି। ତାଳଚେର ସହରରେ ଥିବା ଜଳଖିଆ ଦୋକାନ, ଫାଷ୍ଟଫୁଡ଼୍‌, ହୋଟେଲ ଓ ଢାବାଗୁଡ଼ିକରେ ବ୍ୟାପକ ଖାଦ୍ୟ ଅପମିଶ୍ରଣ ସହିତ ବାସିଖାଦ୍ୟ ଓ ରାସାୟନିକ ପଦାର୍ଥ ମିଶ୍ରିତ ଖାଦ୍ୟ ବିକ୍ରି ହେଉଥିବା ନେଇ ଅଭିଯୋଗ ହୋଇଥିଲା। ଅଭିଯୋଗ ଆଧାରରେ ଆଜି ଏହି ଚଢ଼ାଉ କରାଯାଇଥିଲା। ଅପମିଶ୍ରଣ କରିବା ଅଭିଯୋଗରେ ଦୋକାନୀଙ୍କଠାରୁ ନଗଦ ୬ହଜାର ଟଙ୍କା ଜରିମାନା ଆଦାୟ କରାଯାଇଥିବା ଖାଦ୍ୟ ନିରାପତ୍ତା ବିଭାଗ ପକ୍ଷରୁ ସୂଚନା ମିଳିଛି। ଏହି ଚଢ଼ଉରେ ନିରାପତ୍ତା ଅଧିକାରୀ ସୁମିତ ସୌରଭ ପରିଡ଼ା, ଶ୍ରୀବନ୍ତ ଖଣ୍ଡଗିରି, ବାନାମ୍ବର ପ୍ରଧାନ, ତାଳଚେର ପୋଲିସ ପ୍ରମୁଖ ସାମିଲ ଥିଲେ।