ଅନୁଗୁଳ: ବନ୍ୟପ୍ରାଣୀ ଉଦ୍ଧାର କାର୍ଯ୍ୟକୁ ଅଧିକ ସୁସଂଗତ ଓ ତ୍ୱରାନ୍ୱିତ କରିବା ଲକ୍ଷ୍ୟରେ ଅନୁଗୁଳ ବନଖଣ୍ଡ ପକ୍ଷରୁ ଏକ ମକଡ୍ରିଲ୍ ବା ଯୁଦ୍ଧକାଳୀନ ପ୍ରସ୍ତୁତି ଅଭ୍ୟାସ ଅନୁଷ୍ଠିତ ହୋଇଛି। ୨୦୨୬ ଏପ୍ରିଲ ୧୫ ତାରିଖ ମଧ୍ୟାହ୍ନ ପ୍ରାୟ ୧୨ଟା ୧୦ ମିନିଟ ସମୟରେ କୁଲାସିଙ୍ଗା ମେଗା ନର୍ସରୀଠାରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅଭ୍ୟାସରେ ବନଖଣ୍ଡର ରାପିଡ୍ ରେସପନ୍ସ ଟିମ୍ ଏବଂ ମୋବାଇଲ୍ ଭେଟେରୀନାରୀ ୟୁନିଟ୍ ସକ୍ରିୟ ଅଂଶଗ୍ରହଣ କରିଥିଲେ। ବିଶେଷ କରି ବନ୍ୟଜନ୍ତୁଙ୍କୁ ନିରାପଦ ଭାବେ ଟ୍ରାଙ୍କୁଲାଇଜ୍ କରିବା ବା ନିଶ୍ଚେତକ ପ୍ରୟୋଗ କରିବା କୌଶଳ ପ୍ରଦର୍ଶିତ ହୋଇଥିଲା। ଏହା ସହିତ ‘ଏୟାରୱାଟ’ ଉଦ୍ଧାରକାରୀ ଯାନର ବ୍ୟବହାର ଏବଂ ବିଭିନ୍ନ ଅତ୍ୟାଧୁନିକ ଉପକରଣର କାର୍ଯ୍ୟକାରିତା ଉପରେ କ୍ଷେତ୍ର କର୍ମଚାରୀଙ୍କୁ ପ୍ରଶିକ୍ଷଣ ଦିଆଯାଇଥିଲା।
ଏହି ସମଗ୍ର ଅପରେସନକୁ ଭେଟେରୀନାରୀ ଆସିଷ୍ଟାଣ୍ଟ ସର୍ଜନ ପ୍ରଦୀପ୍ତ କୁମାର ସିଂ ପରିଚାଳନା କରିଥିଲେ। ଏଥିରେ ଏଲିଫ୍ୟାଣ୍ଟ ସ୍କ୍ୱାଡ୍ ଏବଂ କ୍ଷେତ୍ର କର୍ମଚାରୀମାନେ ସାମିଲ ହୋଇ ଜରୁରୀକାଳୀନ ସମୟରେ ଦଳଗତ ସମନ୍ୱୟ ରକ୍ଷା କରି କିଭଳି କାର୍ଯ୍ୟ କରାଯିବ, ସେ ନେଇ ଶିକ୍ଷା ଗ୍ରହଣ କରିଥିଲେ। ଏହି ମକଡ୍ରିଲ୍ ବନ୍ୟପ୍ରାଣୀ ସୁରକ୍ଷା ଏବଂ ଉଦ୍ଧାର କ୍ଷେତ୍ରରେ ବନ ବିଭାଗର ଦକ୍ଷତା ବୃଦ୍ଧି କରିବାରେ ସହାୟକ ହେବ।
