ଅନୁଗୁଳ: ରାଜ୍ୟ ସରକାରଙ୍କ ‘ମୁଖ୍ୟମନ୍ତ୍ରୀ ସହରୀ ବିକାଶ ଯୋଜନା’ ମାଧ୍ୟମରେ ଅନୁଗୁଳ ସହରର ଭିତ୍ତିଭୂମି କ୍ଷେତ୍ରରେ ଏକ ନୂତନ ଅଧ୍ୟାୟ ଯୋଡ଼ି ହୋଇଛି। ସହରାଞ୍ଚଳର ଆଧୁନିକୀକରଣ ଏବଂ ବ୍ୟବସ୍ଥିତ ବାଣିଜ୍ୟିକ କାରବାରକୁ ପ୍ରୋତ୍ସାହନ ଦେବା ଲକ୍ଷ୍ୟରେ ଅନୁଗୁଳ ପୌରପାଳିକା ଅନ୍ତର୍ଗତ ପୁରୁଣା ବସଷ୍ଟାଣ୍ଡଠାରେ ଏକ ଅତ୍ୟାଧୁନିକ ‘ଆଦର୍ଶ ଭେଣ୍ଡିଂ ଜୋନ୍’ ନିର୍ମାଣ କରାଯାଇଛି।
ଏହି ପ୍ରକଳ୍ପ ସ୍ଥାନୀୟ କ୍ଷୁଦ୍ର ବ୍ୟବସାୟୀଙ୍କୁ ସ୍ଥାୟୀ ରୋଜଗାର ପ୍ରଦାନ କରିବା ସହ ସହରର ସୌନ୍ଦର୍ଯ୍ୟକରଣ ଏବଂ ଟ୍ରାଫିକ ସମସ୍ୟା ସମାଧାନରେ ସହାୟକ ହେବ। ବିଧାୟକ ପ୍ରତାପ ଚନ୍ଦ୍ର ପ୍ରଧାନ, ଜିଲ୍ଲାପାଳ ଅବଦ୍ଦାଲ ଏମ୍ ଅଖତାର ଏବଂ ପୌର କାର୍ଯ୍ୟନିର୍ବାହୀ ଅଧିକାରୀ ସତ୍ୟ ପ୍ରକାଶ ତ୍ରିପାଠୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି କାର୍ଯ୍ୟ ସଫଳତାର ସହ ସମ୍ପନ୍ନ ହୋଇଛି।
ରାଜ୍ୟ ସରକାରଙ୍କ ଗୃହ ଓ ସହରାଞ୍ଚଳ ବିକାଶ ବିଭାଗ ପକ୍ଷରୁ ଏହି ସଫଳ ରୂପାନ୍ତରଣକୁ ସରକାରୀ ପୋର୍ଟାଲରେ ସ୍ଥାନ ଦିଆଯାଇଛି। ଏହି ପଦକ୍ଷେପ ଦ୍ୱାରା ପୁରୁଣା ବସଷ୍ଟାଣ୍ଡ ଅଞ୍ଚଳ ଏବେ ଅଧିକ ପରିଷ୍କାର ଓ ବ୍ୟବସ୍ଥିତ ହୋଇପାରିଛି, ଯାହା ସହରବାସୀଙ୍କ ମଧ୍ୟରେ ଉତ୍ସାହ ସୃଷ୍ଟି କରିଛି।
