ଅନୁଗୁଳ: ଅନୁଗୁଳ ଜିଲ୍ଲା ତାଳଚେରରେ ଆଜି ହୋଟେଲ ଓ ଫଳ ଦୋକାନ ଉପରେ ଚଢ଼ଉ କରିଛି ଜିଲ୍ଲା ପ୍ରଶାସନ। ସହକାରୀ ଜିଲ୍ଲାପାଳ ପୁଷ୍ପିତା ମଧୁମତୀ ଦେହୁରୀଙ୍କ ନେତୃତ୍ୱରେ ଖାଦ୍ୟ ନିରାପତ୍ତା ଅଧିକାରୀ, ଯୋଗାଣ ଅଧିକାରୀ, ଓଜନ ଓ ମାପ ଅଧିକାରୀ, ପୋଲିସ ଅଧିକାରୀଙ୍କ ସହଯୋଗରେ ଏହି ଚଢ଼ଉ କରାଯାଇଥିଲା। ହାତତୋଟାର ହୋଟେଲ, ଫାଷ୍ଟଫୁଡ ଦୋକାନ, ଫଳ ଦୋକାନରେ ଚଢ଼ଉ କରି ବିଭାଗ ପକ୍ଷରୁ ୯ଟି ଘରୋଇ ଗ୍ୟାସ ସିଲିଣ୍ଡର ଜବତ କରାଯାଇଛି। ଏଥିସହ ଅସ୍ୱାସ୍ଥ୍ୟକର ପରିବେଶ, ବାସି ଓ ରାସାୟନିକ ରଙ୍ଗ ଯୁକ୍ତ ଖାଦ୍ୟ ପାଇଁ ୪୩ ହଜାର ଟଙ୍କା ଜରିମାନା ମଧ୍ୟ ଆଦାୟ କରାଯାଇଛି। ଆଗକୁ ଯଦି ପୁଣି ଖାଦ୍ୟ ଅପମିଶ୍ରଣ କରାଯାଏ ତେବେ ସମ୍ପୃକ୍ତ ଦୋକାନୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସହକାରୀ ଜିଲ୍ଲାପାଳ ଚେତାବନୀ ଦେଇଛନ୍ତି।