ଅନୁଗୋଳ: ସାତକୋଶିଆ ଅଭୟାରଣ୍ୟ ଭିତରେ ଜନ୍ତୁ ଶିକାର ପାଇଁ ଯୋଜନା କରୁଥିବା ବେଳେ ବନ ବିଭାଗ ଚଢ଼ାଉ କରି ୨ ଜଣଙ୍କୁ ଗିରଫ କରିଛି।
ସୂଚନା ଅନୁସାରେ, ପୁରୁଣାକୋଟ ରେଞ୍ଜ ବାଘମୁଣ୍ଡା ସେକ୍ସନ ଜଙ୍ଗଲ ଭିତରେ ଗତ ୧୫ ଦିନ ହେବ ୨ ଜଣ ବନ୍ଧୁକଧାରୀ ସନ୍ଦିଗ୍ଧ ଭାବେ ବୁଲୁଥିବା ବନ କର୍ମଚାରୀମାନେ ଚିହ୍ନଟ କରିଥିଲେ। ସେମାନଙ୍କ ଉପରେ ନଜର ରଖାଯାଇଥିଲା।
ବୁଧବାର ରାତିରେ ଅଭୟାରଣ୍ୟ ଭିତରେ ବେଆଇନ ଭାବେ ବୁଲୁଥିବା ଖବର ପାଇ ପୁରୁଣାକୋଟ ରେଞ୍ଜର ଗୌତମ ପ୍ରଧାନ ଓ ତାଙ୍କ ଟିମ୍ ଚଢ଼ାଉ କରିଥିଲେ। ଚଢ଼ାଉ ବେଳେ ପୁରୁଣାକୋଟ ଥାନା ଗଞ୍ଜଡ଼ା ଗାଁର ରଞ୍ଜିତ ପ୍ରଧାନଙ୍କୁ କାବୁ କରାଯାଇଥିଲା। ତାଙ୍କ ନିକଟରୁ ୨ଟି ଦେଶୀ ବନ୍ଧୁକ, ୩ ରାଉଣ୍ଡ ଗୁଳି, ଗନ୍ ପାଉଡର ଓ ଗୋଟିଏ ମଟର ସାଇକେଲ ଜବତ କରାଯାଇଥିଲା। ହେଲେ ତାଙ୍କ ସହଯୋଗୀ ସେହି ଗାଁର ସୁରେଶ ପ୍ରଧାନ ସେଠାରୁ ଖସି ପଳାଇଥିଲେ। ଗୁରୁବାର ବିଳମ୍ବିତ ରାତିରେ ବନ ବିଭାଗ ଆଉ ଥରେ ଚଢ଼ାଉ କରି ସୁରେଶ ପ୍ରଧାନଙ୍କୁ ମଧ୍ୟ ଗିରଫ କରିଛି।
