ଆଠମଲ୍ଲିକ : ୬୨ ନମ୍ବର ରାଜ୍ୟ ରାଜପଥ କିଆକଟା ଠାରୁ ବଇଣ୍ଡା ମଧ୍ୟରେ ଗଞ୍ଜେଇ ଚୋରାଚାଲାଣ ହେଉଥିବା ଖବର ପାଇ ଅବକାରୀ ବିଭାଗ ଚଢ଼ଉ କରିଛି। ଏହି ସମୟରେ ବିଭାଗ ପକ୍ଷରୁ ପେଡ଼ିପଥର ନିକଟରେ ଏକ ଚାରିଚକିଆ ଗାଡ଼ି ଜବତ କରାଯିବା ସହ ୩ ଜଣଙ୍କୁ ଗିରଫ କରାଯାଇଛି।
ଜବତ ମହିନ୍ଦ୍ରା କମ୍ପାନୀର ଟିୟୁଭି ୩୦୦ (ଓଡି ୦୨ ଏପି ୨୬୯୬) ଗାଡି ଭିତରୁ ୧୦୨ କିଲୋ ଗଞ୍ଜେଇ ମିଳିଛି, ଯାହାର ଆନୁମାନିକ ମୂଲ୍ୟ ୧୦ ଲକ୍ଷ ୨୦ ହଜାର ହେବ। ସେହିପରି ଜବତ ଗାଡିର ମୂଲ୍ୟ ୬ ଲକ୍ଷ ଟଙ୍କା ହେବ ବୋଲି ଅବକାରୀ ବିଭାଗ କହିଛି l ଗିରଫ ହୋଇଥିବା ସମସ୍ତ ୩ ଜଣ ଉତ୍ତର ପ୍ରଦେଶର l ସେମାନେ ହେଲେ ଉତ୍ତର ପ୍ରଦେଶ ଭାଡୋହି ଜିଲ୍ଲାର ସନ୍ଦୀପ ଗୁପ୍ତା (୨୨) ଓ ରାଧେଶ୍ୟାମ ଚୌହାନ (୨୩), ମିର୍ଜାପୁରର ମନୋଜ ମାଲଭିଆ (୨୯ )। ଡାକ୍ତରୀ ମାଇନା ପରେ ୩ ଜଣଙ୍କୁ କୋର୍ଟ ଚାଲାଣ କରାଯାଇଥିବା ଜଣାଯାଇଛି l
ଭାରପ୍ରାପ୍ତ ଅବକାରୀ ନିରୀକ୍ଷକ ଧରଣୀଧର ପ୍ରହରାଜଙ୍କ ନେତୃତ୍ୱରେ ହୋଇଥିବା ଏହି ଚଢ଼ଉରେ ବଇଣ୍ଡା ଅବକାରୀ ସବ ଇନିସ୍ପେକ୍ଟର ରଞ୍ଜିତା ହରିଚନ୍ଦନ, ଏଏସଆଇ ମାନସ ରଞ୍ଜନ ପ୍ରଧାନ ଓ ଆଠମଲ୍ଲିକ ବଇଣ୍ଡା ଅବକାରୀ କର୍ମଚାରୀ ସାମିଲ ଥିଲେ।
