ଅନୁଗୋଳ: ସହରର ସେଣ୍ଟ୍ରାଲ ଛକ ନିକଟରେ ଆଜି ଦିନ ଦ୍ୱିପ୍ରହରେ ଦୁଇଜଣ ଦୁର୍ବୃତ୍ତ ଜଣେ ବୃଦ୍ଧାଙ୍କ ହାତରୁ ବ୍ୟାଗ ଛଡ଼ାଇ ନେଇ ଫେରାର ହୋଇଯାଇଛନ୍ତି। ବ୍ୟାଗ ଭିତରେ ୩୦ ହଜାର ଟଙ୍କା ଥିବା ଅଭିଯୋଗ ହୋଇଛି।
ମିଳିଥିବା ସୂଚନା ଅନୁଯାୟୀ, ପାଳଲହଡ଼ା ଅଞ୍ଚଳର ଜଣେ ବୃଦ୍ଧା କୌଣସି କାମରେ ଅନୁଗୋଳ ସହରକୁ ଆସିଥିଲେ। ବଜାର ଦେଇ ଯାଉଥିବା ସମୟରେ ବାଇକରେ ଆସିଥିବା ଦୁଇଜଣ ଯୁବକ ତାଙ୍କୁ ଅଟକାଇ ବ୍ୟାଗରେ କ’ଣ ଅଛି ବୋଲି ପଚାରିଥିଲେ। ବୃଦ୍ଧା କିଛି ବୁଝିବା ପୂର୍ବରୁ ସେମାନେ ତାଙ୍କ ହାତରୁ ବ୍ୟାଗଟି ଝାମ୍ପି ନେଇ ଦ୍ରୁତ ଗତିରେ ପଳାଇଥିଲେ।
ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି। ଅସହାୟ ବୃଦ୍ଧା ଜଣକ ଅନୁଗୋଳ ଟାଉନ ଥାନାରେ ଏନେଇ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଘଟଣାସ୍ଥଳ ନିକଟରେ ଥିବା ସିସିଟିଭି ଫୁଟେଜ ଯାଞ୍ଚ ଆରମ୍ଭ କରିଛି। ତଦନ୍ତ ଜାରି ରହିଥିବା ବେଳେ ଦୁର୍ବୃତ୍ତମାନଙ୍କୁ ଧରିବା ପାଇଁ ପୋଲିସର ଖୋଜାଖୋଜି ଜାରି ରହିଛି।
